哥迪奧拿對高普︰曼城對利物浦 精選

原諒筆者尋晚睇完就瞓左。老實呢一場波都算幾好睇，因為其實兩隊都係比較多快馬，節奏都算明快，雖然曼城依然係比較講究控球，但係始終前線辛尼(Sane)、史達寧(Sterling)都係比較快嘅球員，加上迪布尼(de Bruyne)同大衛施華(David Silva) d直線其實可以打快波，利物浦更加唔使講，不過可惜在缺少隊長軒達臣(Henderson)既長傳，更要求逼搶同文尼(Mane)、古天奴(Coutinho)造波。


開賽初段or上半場啦，曼城都幾多利用空位，打快波既，好利用到利記防線既空位，真係不得不講一句：「原來球員中間有條罅架喎，真係你唔劏穿我都睇唔到呀」，但可惜把握唔到。防線上耶耶托尼(Yaya Toure)打返防中位，見佢都逗得幾後，睇返上圖，可能為左防止利記既逼搶反擊，多個人係後都好，反正近期打法上，迪布尼多左回後組織，筆者都提及前線可以靠快馬，利記既防線其實唔算好嚴謹。而及後確實幾次見俾波去左路之後，辛尼出波都偶有佳作，但唔係好俾唔到去右路入懾既史達寧，漏左都起碼兩次以上。至於費蘭甸奴打右閘幾穩健，始終佢都係能攻擅守既球員，戰術意識都唔錯，加上筆者印象中都唔係第一次打呢一個位，雖然出波幾有質素，但係上述個球史達寧漏左佢又執唔到雞比較可惜。

至於利記多數主攻右路，偶爾攻下左邊咁，都有d收獲，古天奴、費明奴(Firmino)都先後有機會左路推大位起腳，但卡巴利路守得好，出迎封位飛撲都有水準，拉蘭拿個球救得更好。不過睇得出古天奴狀態有限，同埋感覺安利簡(Emre Can)進攻上不及軒達臣，少左一瓣中路長傳。防線上因為人腳多數好肯跑動，失位都會立即全速回防，上圖都見中場中三人會回後組成第一道防線，不過最好其實係唔好失位，今場波其實兩隊中場都幾多交失波，我地球迷當然就好啦，多攻門、快攻睇嘛，但球隊而言都係可免則免啦。

另外提一提，卡巴尼路(Caballero)真係幾好波，反應好快，決定都做得好好。


去到下半場，件事又完全相反喎。曼城攻得慢慢入肉，可惜有次後腳後漏到遠柱迪布尼又中柱，不過及後都把握卡拉雲(Klavan)起步慢左，阿古路(Aguero)追平。利記反而變左把握唔到，包括費明奴彈中間拉蘭拿疑似失衡or腳軟，前者自己及後都有球反擊半單刀射斜。打法上曼城銳利既反擊變左去利記打出黎，感覺上螢幕左攻右利反擊，但不利把握。安利簡都突然有一兩球俾得好靚，場波真係同上半場好唔同。

不過一樣既就係古天奴依然無乜態，佢食糊位射既唔中龍、交波都唔到位，希望佢有返態；同埋去到後段其實曼城個勢幾好，都造出唔少威脅埋門，不過可惜既係曼城隊中都可算係首席球星既阿古路呢個時候出唔到黎幫球隊搶分，有球迪布尼係右路搶返個波，出到黎阿古路其實空哂，但竟然大炒，以佢呢個級數既成名球星，正常會期望佢應該幫到球隊奠定勝局。當然，作為車迷，和波我ok，但強強對壘，普遍可能估利記贏既多吧…？

值得一提既係聽到電視旁述表示球證吹得幾好，筆者唔係好識睇，但確實今仗佢吹得幾果斷，判決都無乜爭議點。

筆者最近其實唔係唔打車路士既文，而係…其實球隊無咩問題、贏既模式無乜轉變，筆者唔算好多討論點，唔想為講而講，索性唔講，等待有值得討論下講下先出文吧。

多謝各位不吝賜評，一like一支持，多承指教：
https://www.facebook.com/chelsea.gor.sk