【超級大傻仔】伊朗吞日本三蛋全因「多手」,五人舉手致失波再犯手球輸12碼

馬後炮 於 29/01/2019 發表 收藏文章
亞洲盃四強周一上演伊朗對日本嘅大戰戲碼,賽前伊朗已連續12場不敗,日本亦錄得連續10場不敗,但伊朗作為亞洲內FIFA世界排名最高球隊,加上於2018世界盃分組賽面對摩洛哥、葡萄牙及西班牙分別取得一勝一和一負,韌力十足,喺賽前稍稍被看高。雖然日本取勝晉身決賽本身並唔會令人感到太過意外,但未必好多人估得到佢哋會以3-0輕取伊朗,而伊朗敗因可以話係輸自己,而且係輸自己隻手。


呢場亞洲盃四強嘅上半場,雙方形勢膠著,未有入球出現,伊朗甚至稍稍主導形勢。戰至55分鐘,日本前鋒南野拓實突破到禁區角位,被伊朗守將 Hossein Kanaanizadegan 攔截倒地,五名伊朗球員同時衝向球證,舉手表示並冇犯規,但南野拓實並未存心交戲搏罰球,佢毫不猶豫起身追波,由於伊朗球員離開位置衝向球證,南野拓實無人看管下送出傳中,伊朗守將回過神來,但仍無阻大迫勇也門前頭槌一點入網。

https://i.imgur.com/1zQLHeL.gif
https://i.imgur.com/3fz93R1.gif

伊朗因為一次幼稚園級犯錯而被打開缺口,值得留意伊朗「八號仔」Morteza Pouraliganji ,皆因三個失球前兩個直接同佢有關,最後一個失球同樣見到佢犯錯。呢一球,踢右中堅嘅「八號仔」係最激動衝向球證嘅一個,佢離開自己防區嘅距離亦最遠,大迫勇也正係入楔到「八號仔」本身應該防守嘅位置。

踢波從來都係用腳踢,唔知點解而家啲球員鍾意舉手,對手都未瞓低扮嘢你就舉定手先,舉手唔緊要但舉手唔追波,仲要個個離開自己位置去舉,等於「申請」「打破僵局」。

第二球,67分鐘,「八號仔」倒地攔截時犯手球,球證翻看VAR判罰12碼,由大迫勇也操刀射成2-0。呢一球可以話「八號仔」落地攔截時手部下垂屬於保持平衡嘅自然動作,判罰稍嚴,只可以話佢不幸成為「罪人」。

https://i.imgur.com/2kO2Upz.gif

補時階段,伊朗落後兩球下壓上進攻而輸反擊實屬正常,最終被原口元氣個人突破窄位起腳射成3-0。值得留意,「八號仔」所防守嘅中路偏右,與右閘之間嘅空隙正係日本隊攻擊嘅重心,「八號仔」喺一個完全錯誤嘅時機衝前「標波」,轉身不及更以後腳試圖攔截失敗,狀甚狼狽,完全係一仆一碌,結果佢失位導致右閘「23號仔」需要同時顧忌原口元氣及中路嘅大迫勇也,稍稍收窄位置到兩人中間,輕鬆被原口元氣突破成功。

https://i.imgur.com/ki2HKzx.gif
https://i.imgur.com/X6X3DE8.gif

AFC全場精華
https://youtu.be/smeKmKqFAjo

留言


請按此登錄後留言。未成為會員? 立即註冊
    快捷鍵:←
    快捷鍵:→