世界盃經典回顧：2010南非世界盃最難忘賽事一定係呢場！

距離2018俄羅斯世界盃開幕，得返35日，係時候回顧世界盃經典賽事。2010年南非世界盃，西班牙以傳控足球取得國家史上第一個世界盃冠軍，固然令人印象深刻。不過，烏拉圭亦可謂神奇之旅，佢哋雖然喺早年曾經兩奪世界盃冠軍 (1930、1950) ，但其時世界盃嘅競爭同普及程度都遠不及今日，之後烏拉圭喺世界盃載浮載沉，多次經歷外圍賽出局或分組賽出局，2010世界盃係佢哋近40年最好成績。

2010世界盃嘅烏拉圭前線坐擁科蘭、卡雲尼、蘇亞雷斯，佢哋殺入8強對住加納，呢一仗嘅場面激烈程度同爭議性都堪稱經典。
加納憑蒙達利 (Sulley Muntari) 喺45分鐘遠射世界波先開紀錄，科蘭55分鐘主射罰球扳平，已經夠精彩。雙方戰至加時120分鐘，加納幾乎頭槌攻入絕殺，但生死存亡之際，護空門嘅蘇亞雷斯用手將個波拍出，犧牲自己紅牌出場，點知加納前鋒基恩 (Asamoah Gyan) 主射12碼宴客，果然蘇亞雷斯嘅犧牲為球隊換嚟一線生機，烏拉圭隨即喺互射12碼勝出。有球迷認為蘇亞雷斯刻意手球係無恥行為，但對烏拉圭嚟講，佢就係國家英雄，仔細再睇的話，會發現另一位護空門嘅烏拉圭球員富斯利 (Jorge Fucile) 同樣嘗試用手撲波，「可惜」撲唔中，可見必要時犧牲自己「救國」係佢哋嘅共識。


呢場波，喺FIFA官方頻道，被稱為 "The most memorable match of 2010"：
https://streamable.com/jgf17
結果，烏拉圭喺四強不敵最終嘅亞軍荷蘭，再喺季軍戰不敵德國，拎到第四名，亦係烏拉圭近40年最好成績。