洛蘭迪罕有帽子戲法 熱刺七蛋大炒英乙隊八年來最威

馬後炮 於 05/01/2019 發表 收藏文章
熱刺中鋒洛蘭迪 (Fernando Llorente) 喺熱刺一直被投閒置散,原因只怪頭號射手哈利卡尼近年都狀態火熱。事實上,洛蘭迪質素有目共睹,即使只係喺英超比賽最後幾分鐘登場,而且冇機會取得入波,仍然可以見到佢喺前線衝鋒陷陣嘅效果,甚至間接幫助球隊贏波。33歲嘅洛蘭迪今季各項賽事只為熱刺上陣10場共157分鐘,每次不足16分鐘。周六英格蘭足總盃第三圈,熱刺作客英乙球隊燦美爾,熱刺大幅輪換陣容,令洛蘭迪得以正選上陣,佢亦不負所托以帽子戲法協助球隊大勝一場。


周六英格蘭足總盃第三圈,燦美爾對熱刺。熱刺今仗正選陣容僅派出迪利阿里、孫興民、盧卡斯等常規主力球員,中鋒洛蘭迪就係今季各項賽事第2次正選上陣,至於哈利卡尼及艾歷臣等就得到小休機會。上半場,熱刺喺40分鐘,先由右翼衛奧利亞遠射先開紀錄。


打開缺口後,熱刺於下半場大開殺戒,有洛蘭迪分別於48、70及72分鐘各入一球,大演帽子戲法;另一方面,孫興民亦貢獻兩傳一射,其中包括一球於中圈起動獨闖龍潭嘅個人表演。

loading


已經領先六球之下,熱刺於75分鐘將功臣洛蘭迪換走,竟然換入當紅射手哈利卡尼寓賽於操兼「落井下石」。"Harry Claim" 最後階段接應迪利阿里傳送,單刀笠射建功,令熱刺大炒燦美爾7-0。熱刺主帥普捷天奴解釋,尾段換入哈利卡尼係為咗向主場球迷表示尊重,等佢哋可以看到英格蘭標誌球星嘅風采 ('To show respect to people here so they could see an English icon') 。


今仗熱刺刷新多項數據,其中包括:熱刺自2009年11月於英超大炒韋根9-1後最大差距勝仗、熱刺自1960年2月足總盃第四圈重賽大炒克魯13-2後最大足總盃勝仗、洛蘭迪加盟熱刺以嚟第二個帽子戲法(上一次同樣於足總盃發生,2018年2月對羅奇代爾)、哈利卡尼近八場足總盃賽事攻入九球,其中八球於非英超球隊取得。

loading


另外,熱刺兩名小將於今場上演處子戰。

loading

全場精華

https://streamable.com/nobe3

留言


請按此登錄後留言。未成為會員? 立即註冊
    快捷鍵:←
    快捷鍵:→