【個人精華】邊個話恩尼斯達不復當年勇?對德國中場玩晒,踢半場夠做MVP

馬後炮 於 25/03/2018 發表 收藏文章
巴塞隆拿中場恩尼斯達無疑係一代中場大師,佢當年比五名意大利球員包圍嘅一幕已成經典,不過「小白」現年已經33歲,今年5月就年滿34歲,加上今年傳出佢有意接受中超球隊邀請嘅消息,令近來比較少留意佢球迷,以為佢已經「玩完」只能到其他水平較低嘅聯賽養老。


事實上,恩尼斯達今季為巴塞各項賽事上陣33場,場均上陣時間為66.6分鐘,仍然屬於球隊重要主力,只係為咗適當分配佢嘅體能而減少上陣時間,而且「小白」今季更不時出任左中場,少啲活力都唔得。喺最近國際賽期,小白作為老將仍然入選友賽名單,更正選上陣大戰世界盃盟主德國。


德國中場人才輩出,今仗有墮後派牌型嘅卻奧斯,及覆蓋範圍大嘅基迪拉坐陣中場;恩尼斯達攜同兩名後輩泰亞高艾簡達拿及高基組成三人中場線,位置靠左嘅小白不時面對德國隊位置靠右嘅基迪拉及拜仁新星甘美治,但仍然舉重若輕,開賽6分鐘就喺基迪拉面前交出致命直線,隊友洛迪高觸球之時已經身在六碼線,單刀輕鬆射成1-0。

https://i.imgur.com/6FFKPgA.gif
https://i.imgur.com/jBlvZTh.gif

身體機能會下降,但技術、判斷、意識仍在,小白其餘時間表現出色,分波時機、保護腳下球、節奏控制、傳波線路、走位選擇,統統展現一流水平,甚至可以話喺號稱機動嘅德國中場面前予取予求,相信喺70分鐘之內佢仍然係當年嘅小白。今仗佢喺下半場被換出,但僅以45分鐘表現,已經足夠成為 Man of the Match!


順帶一提,相信只要小白願意,佢就能夠留喺巴塞直至退役,但今次中超球隊所開出嘅條件不止於一份優厚薪金,而係額外加上幫助佢個人旗下紅酒莊生意打入中國嘅條件,基於中國市場龐大,如果小白有意為退休生意鋪路,呢個係極大嘅引誘。

恩尼斯達對德國個人精華

https://streamable.com/p32qa

https://streamable.com/d6u5t

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→