【佛都有火】車熱大戰被開肘打中,「小毒毒」簡迪罕有疑似發火露霸氣

馬後炮 於 25/01/2019 發表 收藏文章
球壇之中,有好多好波之人,但呢啲好波之人,好多喺球迷中反應都有兩極,今時今日已經好少人可以做到朗拿甸奴咁樣令死敵球迷衷心尊敬,如果要講一個現今頂級球員中最冇爭議嘅人,一定係簡迪!


車路士中場簡迪為人低調,99%時候都以笑臉迎人,更遑論作出任何不君子行為。簡迪作為一位「小毒毒」,2018世界盃協助法國奪冠之後,竟然怕醜唔敢問隊友拎獎盃影相,慶功時一眾隊友唱「簡迪之歌」稱讚佢場上貢獻時,亦面露靦腆之情,實在太可愛,加上佢喺球場上無處不在嘅表現,咁樣嘅球員實在係現役最難令人討厭嘅球星。


除咗低調之外,簡迪亦時刻保持和藹可親嘅笑容,早前車路士小將赫臣奧度爾 (Callum Hudson-Odoi) 就曾經上傳一段影片,當時赫臣奧度爾同簡迪喺電子遊戲《FIFA》上對決,赫臣奧度爾連贏三場,簡迪喺第四場中段已被炒四蛋,「憤」而離場。不過,簡迪熄機走人時仍然笑容滿面,可見要真正激嬲佢係好有難度。


車路士喺聯賽盃次回合中,12碼大戰淘汰熱刺,簡迪射入精彩入球,同時罕有地令人感覺到佢少有怒意。當時簡迪接到隊友傳球,控球離腳,熱刺後衛丹尼路斯上前搶截,爭球期間丹尼路斯疑似開肘擊中簡迪,其後簡迪加速鏟向丹尼路斯。罕有地,簡迪完全無視丹尼路斯痛苦倒地,氣定神閒咁去執返出界嘅波,十分有氣勢,隱約感受到佢心中微慍,可以話係佛都有火。

(GIF圖Loading,請稍後片刻)

網上有唔少球迷表示,好少見到簡迪咁樣加速落地攔截,亦認為丹尼路斯開肘動作理應被罰黃牌,不過同時有球迷認為簡迪嘅攔截屬於報復行為,同樣應被警告。

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→