三場失五球 施丹次子守龍上前進攻角球,前曼聯水貨快攻射入空門

馬後炮 於 15/09/2019 發表 收藏文章
法國球王施丹 (Zinédine Zidane) 有三位兒子成為足球員,其中24歲嘅長子安素施丹 (Enzo Zidane) 司職進攻中場,現時效力葡超球隊艾維斯 (Desportivo Aves) ;21歲嘅次子盧卡施丹 (Luca Zidane) 就司職門將,喺父親執教嘅皇家馬德里麾下曾經被提升為三號門將,更有兩次上陣紀錄。不過,盧卡施丹距離成為一位可以予人信心嘅門將,仍有一段距離,青年軍時期亦有唔少低級失誤,包括一次被指驚波。


今季,盧卡施丹以外借身分加盟西乙球會桑坦德,汲取經驗,而佢亦的確成為球隊一號門將。9月14日西乙第5輪比賽,華歷簡奴主場對桑坦德,盧卡施丹正選上陣。

開賽僅17分鐘,華歷簡奴就由中堅沙維列治 (Esteban Saveljich) 接應傳中,近門頂入成1-0。雙方上半場各有一名球員兩黃一紅被逐。57分鐘,桑坦德獲得12碼,但後備入替嘅法國中場尤達 (Karim Yoda) 主射中楣彈出。


戰至補時階段,落後一球嘅桑坦德盡力一搏,門將盧卡施丹上前參與角球進攻。不過,盧卡施丹於禁區外爭頂高空波失敗,華歷簡奴快速反擊,由前曼聯前鋒碧比 (Bebé / Tiago Manuel Dias Correia ) 長途奔襲射入空門。最終,桑坦德以0-2輸波。

精華片段

事實上,盧卡施丹今場亦不乏精彩撲救,而且補時階段上前參與進攻角球亦係落後一球時嘅慣常做法,導致再失一球嘅後果,其實已經係呢個採取呢個行動時已預期嘅最壞打算,所以唔可以怪罪門將。不過,盲目相信門將上前助攻可以獲得高空攻勢係會付出代價,原來盧卡施丹身高只有1.83米,上前助攻角球又係唔係真係有幫助呢?其實身型較矮細嘅門將一般都唔會咁做,例如奧斯賓拿等南美門將就可免則免啦。到底呢個決定係球員自己作出,還是主帥決定呢?就不得而知喇。

賽後,桑坦德5戰只得2分,只可以排喺西乙第20位,盧卡施丹其中兩仗因傷缺陣,共上陣3場失5球,睇嚟球隊亦需要改善防線,否則可能陷入降班危機。


Source: Marca

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→