果斷定球員去留 雲戈爾功力漸現

Box to Box 於 19/07/2015 發表 收藏文章
重點針對弱點位置補強,雲戈爾正正示範了頂級領隊如何極具效率地進行轉會操作,而雲加繼上季送法比加斯這份大禮給摩連奴後,今季再接再厲,將舒拉達連拱手相讓給有迫切需求的雲戈爾…. 所以太感情用事,對球員太忠誠,給予太多機會,也可以變成一件壞事….


2014-15球季對曼聯,對雲戈爾來說,都只能算是一個合格的球季。球隊遭受一季重創後,在雲戈爾帶領下,一直沒有放棄治療,慢慢走出低谷,整體發揮雖不算出色,不過憑着前鋒和門將的個人質素,最後都總算達到季前設下的最基本目標,打進聯賽榜頭4位,重返歐洲最頂級賽事。

排頭4位當然不是雲戈爾和曼聯的最終目標,而是讓曼聯重返英超和歐洲冠軍的第一步。這種循序漸進的進步方式,是雲戈爾進行維護和重建的方法,他上任時亦許下利用三季時間重奪英超的誓言。成功在2014-15重奪頭4後,2015-16球隊就要成為競逐聯賽冠軍的一份子,而2016-17球季,就是要奪標的一季,所以上季雲戈爾修復好莫耶斯的負面影響後,今季就開始著手針對性地解決球隊的弱點,包括右後衛、中堅、進攻球員欠速度,和積弱已久的位置 – 中場中。


自從堅尼離隊後,曼聯的中場中位置都一直為人所詬病 (史高斯不算中場中),亦儼然成為了費格遜的一個盲點﹔在莫耶斯年代的2013-14球季,菲爾鍾斯、基華利及費查3人於中場中位置合共正選上陣達38次,以曼聯對正選球員質素的要求來說簡直是匪夷所思﹔至於在去季,在中場中出現過的球員包括費蘭尼、靴里拉、朗尼、馬達、費查、基華利、迪馬利亞、贊奴沙、卡域克,甚至華倫西亞…. 在傷患困擾及球員表現未如理想下,雲戈爾被迫不斷作出嘗試。雖然球季末段找出了最佳方程式,但今年夏天他仍然決定購入兩名星級中場中,打算徹底解決這個問題。同樣地,達米安和迪比的加盟,也解決了右後衛和進攻球員欠速度的毛病。

這些球員的加盟,或多或少會影響到原有球員的上陣時間,即使楊格和費蘭尼表現比前回勇,但相信經過今夏之後,上陣機會定必減少,更遑論正選機會。雲戈爾在五月受訪時表示,手下某些球員將會迎來一個難過的夏天,結果本身表現麻麻、上陣不多、不合雲戈爾心意的球員,他亦果斷決定斬纜,如未能將潛質轉化成能力的蘭尼、未能回復以往功力的法卡奧、正走下坡的雲佩斯等,已被領隊放棄的域陀華迪斯和拉斐爾甚至不用隨隊到美國作季前集訓。事實上,要爭冠的球隊真的不能太理想化,太感情用事,而必然要面對現實,領隊亦要敢下決定,不能拖泥帶水,將手上的資源作最有效的配置。即使領隊的決定不一定每次都正確,但這種做重大決定的魄力及最善用手上資源的能力,正是成功領隊的基本要素之一。


這邊廂雲戈爾的果敢決斷,跟那邊廂的雲加正好成一強烈對比。雲加絕對是英超其中一位最成功的領隊,能力不用多懷疑,這一點相信絕大部份球迷都同意,但這不等如大部份人會視下季阿仙奴為正式的英超冠軍競爭者。雖然距離轉會窗關閉還有個多月,但如果說阿仙奴今夏的一隊球員收購只有施治一人,相信不少人也不會覺得意外,對比曼聯方面對陣容的修補,難免相形見絀。環觀阿仙奴陣容,門將一環當然可以改善,但前鋒和防守中場的位置亦有補強的必要。上季上半季基奧特受傷加上防中無人可用,縱使有山齊士坐陣,球隊成績亦不佳﹔下半季有基奧特復出及哥基連回歸,令球隊成績有顯著進步,說明這兩個位置和這兩位球員的重要性。問題是,誰能擔保基奧特和哥基連兩人下季都不會受傷,又能長期維持良好狀態?

在明眼人都看到曼聯對中場中的渴求下,加上己隊防中位置的人選不多 (阿迪達和法明尼之流就別提了) ,雲加依然選擇不出手,將法國中場舒拉達連拱手相讓給競爭對手曼聯。就算雲加視舒拉達連為哥基連前一格的位置,要與藍斯甚至客串該位置的卡蘇拿競爭,這個決定仍然令人莫名奇妙,君不見上季雲加稱法比加斯與隊中太多球員位置重疊,而將他讓給車路士,結果為車路士鋪好奪冠之路嗎?今季他仍然未能汲取這次經驗,留下了近兩季「傷多過踢」的韋舒亞,而不引入舒拉達連,反而把他讓給對手曼聯,又將史達寧讓給曼城而留下禾確特。當然,韋舒亞和禾確特來季或者不會再受傷患困擾,表現也或會令人刮目相看,但這個「可能」已經持續了兩、三季,反正他們都不是正選材料,何不賣走,將資源投放於增強球隊實力之上?雲加這種對球員充滿信心,希望不斷給予機會的性格,說明了他真的是一個好人,有值得大家敬重的品格,可惜,這不是長年爭奪聯賽冠軍的領隊的所需條件。迪亞比這位極不幸的球員,在摩連奴和雲戈爾麾下,恐怕頂多只有一季機會去證明自己的身體狀況,根本不可能有三、四季機會。


在現代球壇要成功,最忌感情用事。最頂級的領隊,環顧陣中球員,會去想哪個位置可以再補強或提升,就如摩連奴看到馬達和舒爾尼,仍然會想怎樣去upgrade﹔雲戈爾看到楊格和費蘭尼回勇,仍然會找更強的球員取代他們,基華利約滿離隊也不足惜,但雲加呢?韋舒亞和禾確特季尾幾場好表現,令雲加再次將希望放在他們身上,多給他們一季的時間去表現自己。情況相類似的盧卡古和蘭尼,已分別被兩位領隊放棄,將資源 (轉會費 / 薪酬空間) 放到更強的球員身上去增強球隊實力。法明尼上週被問到正選位置被哥基連搶走的看法時表示,在強隊來說是很正常,但大家能想像今時今日的法明尼,在曼聯、車路士、甚至曼城會是防中的第幾個選擇?起碼是第五或第六選擇吧?以剛得到舒拉達連的曼聯來說,法明尼肯定排在卡域克、舒拉達連、小豬、白連特、費蘭尼、甚至靴里拉之後,你說,這樣的阿仙奴,怎能令支持者以外的球迷有信心,可以挑戰英超冠軍寶座?

曼聯在這個夏天如能再購入中堅和前鋒,來季人腳上絕對有足夠實力挑戰第二位位置,曼城得到潛質優秀的史達寧又即將購入中場戴夫,除了令陣容倍添活力,也填補了本土球員名額,令本來形勢大好的阿仙奴,突然又遇上麻煩,看來阿仙奴要奪冠,至少又要再等一季,相反,雲戈爾的曼聯,支持者有愈來愈多樂觀的理由了。

註:Box to Box 在Facebook亦有開設專頁 (https://www.facebook.com/hkboxtobox),請多多支持﹗

S

如果喜歡我們的文章,請即分享到︰

標籤: #雲戈爾  #曼聯  #雲加  #boxtobox  

留言


請按此登錄後留言。未成為會員? 立即註冊
  • Lin Wing Hei 於 19/07/2015 評論 NO. 1

    為左奪冠,而唔似費sir咁著重青訓,值得咩

  • Jojostar 於 19/07/2015 評論 NO. 2

    我係曼迷. 以篇文算係為雲帥平反. 話佢大使嘅人應該無睇幾年曼聯波. 雲帥出名重視青訓以往沙維梅拿都係佢提升一隊. 費sir係好重視青訓之不過大家除咗記得92班仲記得邊嗰? 有呀Pique Pogba囉不過費sir零用Evans 聰明仔費查都唔用以兩嗰青瞓出身嘅巨星囉. 前年要史高斯38歲復出(又係大大個Pogba擺後備)就知中場線幾大鑊啦. 曼聯唔買人真係唔使踢. 費sir時代已經比太多時間蘭尼聰明仔費查. 我話LvG已經好有人情味,仲比機會Evans.

  • Jojostar 於 19/07/2015 評論 NO. 3

    Rio Evra喺摩耶斯執教前已走 Vidic直頭講明完季就走啦 係見到Moyes唔開胃. Rvp都季中要走 唔係摩耶斯決斷丫

  • jacob2013 於 19/07/2015 評論 NO. 4

    作者不用為雲加這樣用心, 我相信老人家明知, 而且佢亦唔會學效雲高爾同摩連奴, 這是價值觀既不同, 世界太多雲高爾同摩連奴, 既然沒人逼作者喜愛雲加作風, 就順心去愛其他人吧

  • 揾邊位 於 19/07/2015 評論 NO. 5

    買成隊波返黎, 同我玩fm差唔多, 你j埋我果份

  • Jojostar 於 19/07/2015 評論 NO. 6

    帶曼聯帶到第7 轉會買人一鑊泡 如果你都仲讚得佢落 你都應該係嗰d10年唔捧盃都開心嗰d球迷嚟

  • 亞男 於 19/07/2015 評論 NO. 7

    jacob2013👍👍👍

  • kinfung 於 19/07/2015 評論 NO. 8

    jojostar,買人一鑊泡?你自諗下上季幫你地搶左幾多分既費蘭尼同馬達係邊個買反泥既,你感講法太過分,你吾諗下點解費sir用蘭尼卡華利費查會拎到英超,而雲92用過億買左天做靴里啦梳爾白蘭特都係得第四,領隊吾掂定青訓吾得已經好明顯,你收左雲92幾多錢呀

  • Jojostar 於 19/07/2015 評論 NO. 9

    @kinfung 我諗你唔係follow得好貼. 首先moyes喺打deadline day先急急簽入費蘭尼 仲要喺佢買斷條款過咗比多拖肥糖400萬磅. 之前淨係追住法比仔d唔實際嘅目標結果無嗰買到. 跟住1月panic buy馬達比車仔當水魚咁㩒. 我本身都鐘意馬達同爆炸頭無否認過佢地上季嘅表現. 不過你好似唔記得喺moyes嗰陣, 佢兩嗰不停比人話表現唔到身價. 爆炸頭尤甚 今季佢兩嗰都係雲帥底下打翻身波. 另外回應你第二點.費sir最後攞冠軍係靠班正選Giggs,Rio,Vidic,Evra,Scholes(復出救亡)你幾時見過nani cleverley可以獨擔大旗. 鋒線數胡靠top fit嘅RvP. 朗尼做墮後中場踢咗幾多季呀大佬. ok班骨幹成員退休嘅他投嘅 你想雲92用班後備兵攞返冠軍? 我無收咩錢我肯定熟曼聯多過你先.

  • Jojostar 於 19/07/2015 評論 NO. 10

    @kinfung 仲有除92班你數得出幾多嗰曼聯青訓係掂嘅? Evans? 唔好玩啦呱 Smalling Jones費sir唔使買佢地返嚟啦 仲要季季傷多過踢 你知唔知Evans係曼聯到以家淨係可以出勤半季. 雲帥今年提拔咗McNair Blackett Lingard Pereira上一隊又唔見你地提下嘅? 即係其他豪門年年幾千萬磅買人就得.雲92買人填洞就要比你地批評?

  • Jojostar 於 19/07/2015 評論 NO. 11

    我唔係喺度話雲92勁過費sir 一定無可能. 不過費sir無留低一隊有實力嘅係事實. 以家雲92只係做返必要做嘅嘢. 當巴賽買尼馬哨牙皇馬買巴爾占士嘅時候(仲未計車仔曼城)你要曼聯用青訓? 最後我想講曼聯係咁多列強注冊最多本土球員嘅.

  • sohoihei 於 19/07/2015 評論 NO. 12

    椰子英超拎第幾呀……第七呀!!買完人番黎都唔識用,費蘭尼買番黎得個企字,要全靠V92激活,令距由籮底橙變成前四功臣-前場攻擊核心,椰子上季一敗塗地,令曼聯個名臭曬,如果唔抄距,根本唔會再有頂級球員來投,長遠變成猁記咁,所以抄椰子決定不容置疑。。

  • Mark Tsui 於 19/07/2015 評論 NO. 13

    J得爽嗎?哈哈

  • Mark Tsui 於 19/07/2015 評論 NO. 14

    jacob2012, nice speech

  • Jojostar 於 19/07/2015 評論 NO. 15

    比錢嗰班主都未出聲 咁多年喺曼聯斂財 以家攞返錢出嚟買人好應該丫

  • 摩老豆 於 19/07/2015 評論 NO. 16

    v92威力 係咪教親球隊都隊內矛盾 最後恥辱踢走

  • Jojostar 於 19/07/2015 評論 NO. 17

    以嗰的確係隱優

  • sohoihei 於 19/07/2015 評論 NO. 18

    其實曼聯費sir最後個一兩季冇嘜點洗錢(如13球季 伊佬+香川 加起黎都唔超過五千萬鎊,遠低於其他列強)所以而家只係洗番以往冇洗既錢,尤其以往未有效增兵即中埸,加上曼聯吸金力高,所以曼聯而家洗得有理

  • Jojostar 於 19/07/2015 評論 NO. 19

    well said sohoihei

  • Choo Wei 於 19/07/2015 評論 NO. 20

    still four??Hahahha

  • 黃華強 於 19/07/2015 評論 NO. 21

    史高斯不算中場中 ... 唔通係軍醫... ?

  • LordBendtner 於 19/07/2015 評論 NO. 22

    大致同意
    但“又將史達寧讓給曼城而留下禾確特”
    dafuq😲

  • kinfung 於 19/07/2015 評論 NO. 23

    jojostar,冇人批評過你地買人,不過衣篇擺明飛機文,你覺得雲92勁,好既,佢上季用左成1.5億買人,最後成績係點?你睇反車仔用1億,阿記主要簽左山齊士,曼城上季比人限買人,最後衣三隊都過曬你隊曼頭。點解?因為雲92吾識用人,天使老虎梳爾成億全部浪費曬,仲有費蘭尼吾係moyes吾識用,係不停傷啫,馬達係moyes手下踢得吾差,你既雲92成日踢得好都吾用佢。冇人話吾比佢買人,問題佢買既人反泥用得好好?好明顯佢眼光吾得加用人吾得,衣篇文話咩功力漸現,佢上季既功力已經比球迷睇曬,上季你真係覺得曼踢得好?我話你過分只係吾妥你講到moyes禁一毛不值

  • kinfung 於 19/07/2015 評論 NO. 24

    Wilson chan ,Samson Chan ,Joe chui ,totally agree with u all

  • 534202 於 20/07/2015 評論 NO. 25

    caution wet floor

  • Jojostar 於 20/07/2015 評論 NO. 26

    kinfung 好講moyes唔fair? 我真係諗唔到會有曼迷會like moyes囉 爆炸頭你話傷唔計 咁馬達同樣兩季都踢右路 上季踢到識飛啵. 你話車仔曼城無使錢 你係味想笑死我? 中東佬油王入主使咗幾多錢呀? 上網睇下前四五年兩隊轉會費先講啦. 費sir最後嗰6年買得嗰香川返嚟 個saha買嚟唔知做乜 又無人記得

  • kinfung 於 20/07/2015 評論 NO. 27

    jojostar,你條傻仔吾識中文?知吾知咩叫車仔洗左一億?冇人話過車仔有買人喎柒頭-_-真係笑死我,係呀香川saha係失敗收購,不過你吾好理,費sir買錯人都拎英超冠軍,你話用衣四五年轉會費泥比較,感做完全冇意義,因為前幾年仲係費sir教,而上年開始先雲92教,我剩係知雲92一季洗左1.5億鎊都係得第四,全季--66,你同意衣篇文啫係同意雲92勁,吾該你講反正題,洗左1.5億拎第四,真係勁撚到我都吾知講咩好啦吾jojostar

  • kinfung 於 20/07/2015 評論 NO. 28

    *冇人話過車仔冇買人喎

  • Jojostar 於 20/07/2015 評論 NO. 29

    kinfung 真係龍門任你擺 你唔妥我話莫耶斯 我同你講返事實係佢轉會操作好失敗. 我之前完全無講過雲92好勁(唔該自己睇返我最初留言) 我只係話佢買人係必須 因為以嗰係費sir種下嘅果 你以家話唔理以前嘅嘢喎哈哈 你識波嘅都知半隊新買返嚟係要磨合 你先係將話題轉來轉去 仲有唔使爆粗嘅 大家討論下姐

  • Jojostar 於 20/07/2015 評論 NO. 30

    kinfung 同埋你唔好咁武斷 篇文係主要講轉會買人決定球員去留 係你自己扯咗去話我覺得雲92好勁. 我只係認同佢買人係正確 至於佢戰術勁唔勁睇下今季交到咩出嚟先決定. 不過一樣好肯定係佢勁過moyes好多

  • Lee Yung Ching 於 20/07/2015 評論 NO. 31

    吊搞你!讲卖这个卖哪个你去做领队啦

快捷鍵:←
快捷鍵:→