《臨完場前由三分變一分 保守調動成失分關鍵?︱車路士對愛華頓英超賽後感》

BluexLion車迷手記 於 20/03/2023 發表 收藏文章
《原創文章 歡迎轉載 請列明出處 謝謝》
-請支持Bluexlion車迷手記 Facebook專頁-


菲歷斯再次取得入球可以話係今場波既最大亮點,亦總算無辜負佢近期喺場上既努力,雖則入球都係黎自中柱(笑),可惜最終都未能成功全取三分,問題出現喺邊度?相信會有一番討論。

面對住經已唔係林伯特執教既愛華頓,樸達沿用三中堅陣式,正選收起左古古尼亞用番巴迪亞舒尼打左中堅,而身旁既就繼續係高列巴尼以及科芬拿,左右翼衛依然都係捷維爾同列斯占士,中場亦同樣係高華錫拍安素費南迪斯,而前場就抽起左上場打正選既梅迪歷,用番傷癒復出既佩利錫伙拍菲歷斯同夏維斯任三攻堅。


如果單以上半場既表現同場面黎睇,其實比預期黎講係有唔少值得鼓掌既畫面,達治所帶領既愛華頓用意明顯,嘗試用人數嚴密佈防再搵機會打反擊,而車路士過去每當面對住哩類型防守為主既對手時,都只能做到外圍猜傳,成功透過陣地戰打到入心臟地帶既攻勢並唔多,偏重於透過兩邊翼衛既傳中或插入中路至搵到缺口突破,不過今場波上半場車路士就成功搵到唔少機會,更加係主力由中路發動起攻勢,佩利錫、菲歷斯以及夏維斯輪流回後到中場做策應,球隊可選擇既出球點多了,而球員與球員之間更多小組短傳走位,畫面的確係幾流暢。

但去到下半場既車路士既老問題就開始出現,未能持續上半場既優勢,愛華頓亦開始主動控球,投入更多人員同力量去做中場爭奪,面對住企穩左陣腳既愛華頓,主隊藍軍就踢得更為被動,雖然菲歷斯一下刁鑽角度既地波撞內柱為車路士先開紀錄,但喺正選球員體力逐漸下降之下場上形勢已經開始拉到均等,而樸達亦喺62分鐘抽起左下半場較少現身既佩利錫換入干拿加拉加,補充場上活力之餘亦嘗試利用球員既覆蓋面去抵擋對手中場既壓制。


不過再一次因為防守角球失誤而被水晶宮追平,今季球隊喺面對死球時無論喺佈防還是基柏迎兩面高波都比唔到球迷好大信心,其後雖然有占士博得十二碼由夏維斯射入,不過臨完場前都比愛華頓把握得到高列巴尼既個人失誤追平,而喺哩個入球出現之前樸達相繼換入路夫斯捷克以及查路巴上場,用意似乎希望利用身高優勢去抵擋高空波,誰不知一不留神就比森斯由車路士右路進行突破,而其中路夫斯捷克以同查路巴就正正係負責右路既球員,亦正因為查路巴無做好準備而令負責中路既高斯巴尼要做補位,前者都需要為哩個失波負上一定責任。

繼而好多人對樸達既臨場調動都存在疑問,換人名額亦無用盡到,都令人覺得佢既調動相當保守,一尾想守到尾但最終如意算盤都無打響到,臨完場前由三分變一分,無論係過程還是結果黎講哩種感覺都唔好受。


文章發表時間 : 20/3/2023 17:40
文章最後更新時間 : 20/3/2023 17:40

《原創文章 歡迎轉載 請列明出處 謝謝》
Bluexlion車迷手記 每週出文 用心寫每篇文章 給我們一個Like作支持 : https://www.facebook.com/bluexlion/
標籤: 車路士  愛華頓  

留言


請按此登錄後留言。未成為會員? 立即註冊
    快捷鍵:←
    快捷鍵:→