《失色的紅藍大戰 出色的精彩鏡頭︱利物浦對車路士英超賽後感》

BluexLion車迷手記 於 23/01/2023 發表 收藏文章
《原創文章 歡迎轉載 請列明出處 謝謝》
-請支持Bluexlion車迷手記 Facebook專頁-


一場算係失色既紅藍大戰,由兩隊分別係排緊聯賽榜中游既利物浦喺主場迎戰車路士,兩支球隊分別都受著唔同程度既傷兵問題所困擾,雖然比數上最終握手言和各得一分,不過進程中都不乏精彩既對攻畫面,總算都沒有令兩邊球迷失望既一場賽事。

單以出場十一人既陣容黎睇大約都估到樸達會繼續以三中堅應戰,事關裏面有唔少後防球員喺名單上,但到開場時個企位就有兩個位置令人意想不到,一個就係薛耶治被安排喺一個右翼衛位置,原先以為係查路巴負責,反而後者同施華以及巴迪亞舒利合組三中堅,而古古尼亞就出任左翼衛,至於另一個令人意外既就係小將賀爾同佐真奴打雙中場,前者喺青年梯隊時期其實都有打個哩個位置,相信高華錫既缺陣迫使樸達作出哩個安排,而前線三人就分別係夏維斯、蒙特以及干拿加拉加。


如果按場面黎睇,可以用大約六四分比黎形容,車路士係稍稍佔優既一邊,而利物浦各自喺半場休息前後同完場前都撳到一段,兩邊都各自有唔少精彩攻勢畫面出現,樸達似乎都開始搵到球隊依然要以三中堅陣作為穩定基礎,的確按現時後防人腳黎睇,即使新加盟既巴迪亞舒利喺元素上都較為適合擔任三人防線中偏左中堅既人選,而今場佢同查路巴既表現都算幾穩定,以年青既防守球員黎睇唔強求做得多,穩穩紮紮就已經相當足夠。

至於今場被安排擔任右翼衛既薛耶治表現都非常亮眼,助攻助守,自世界盃後佢既狀態都相當上力,而從戰術層面角度薛耶治喺近幾場波都成為左陣中最具創造性既球員,多下右路既傳送都成功送入對手禁區製造威脅,究竟係樸達搵到佢既說明書還是球員都身體力行尋求下家就要再睇,不過哩啲元素都係其他球員所缺乏;而小將賀爾都有唔少關鍵失誤出現,可幸未有直接令球隊出現失波,不過對於佢黎講都唔能夠強求太多。



前線方面加拉加喺今場既定位就顯著得多,向來都應以前場球員既身份作賽至能發揮得出本身既優勢,佢喺賀爾未被換出前主要喺負責前場左路區域,攻守兩端都有同樣既輸出,加上加拉加本身能夠做到第一點反搶同活力元素,都令前線踢得更有「生氣」,相反蒙特近兩場就真係變左隱形戰機咁,感覺好似每十分鐘先現一次身出黎博下腳,中前場又唔係好見到佢既畫面,開始變得沉寂,至於夏維斯都交出唔錯既成績,雖然先食咋糊,不過佢喺前場都成功反搶左唔少機會為球隊製造反擊機會。

最後想快少少篇幅講下新加盟既梅迪歷,佢喺下半場早段55分鐘入替賀爾出任左翼,幾下推進同策應都見得到球員既質素,而且提速度高加上推望相當痴腳,都令唔少球迷對佢存在希望,質素同潛力係有,不過最重要既係希望佢唔好咁快比人踢傷,而佢既師兄佩利錫就係好好既例子。

最後適逢過年,祝一眾車迷心想事成,身體健康,而球隊黎緊能夠兔氣揚眉,步步高升。


文章發表時間 : 23/1/2023 12:00
文章最後更新時間 : 23/1/2023 12:00

《原創文章 歡迎轉載 請列明出處 謝謝》
Bluexlion車迷手記 每週出文 用心寫每篇文章 給我們一個Like作支持 : https://www.facebook.com/bluexlion/
標籤: 車路士  利物浦  

留言


請按此登錄後留言。未成為會員? 立即註冊
    快捷鍵:←
    快捷鍵:→