《同樣是「回家」卻獲普遍車迷歡心 今日離別他日戰場上再見︱添姆雲拿以三冠完成史丹福橋之旅》

BluexLion車迷手記 於 17/08/2022 發表 收藏文章
《原創文章 歡迎轉載 請列明出處 謝謝》
-請支持Bluexlion車迷手記 Facebook專頁-


添姆雲拿,一個自問好努力好努力好努力但得唔到同等收鑊既球員,即使聯賽風格不同,球隊戰術未必可以完全將佢發揮得到最佳水平,不過只要佢獲得上陣時間,雲拿都會拼盡每一分秒唔會「揸流攤」,相比起同樣離開回家既盧卡古,添姆雲拿喺史丹福橋所接受既掌聲一定會更多。

兩年前選擇離開德甲轉投英超,環境轉變對球員黎講絕對係新挑戰,尤其係雲拿本著德甲射手之名,當時既潛在買家並唔少,正當外界都認為佢會加盟利物浦之時,誰不知車路士意外地殺出來冷手執個熱煎堆,連同同鄉夏維斯一同登陸史丹福橋,再加上薛耶治、堤亞高斯華等人既加盟,令藍軍一度成為應屆轉會窗既重點標題對象之一,時任主帥兼名宿林伯特既魅力成為多宗轉會既關鍵。


不過林伯特好快因為戰術問題同球隊成績而落台,換上同為德國藉教練杜曹上任,亦好快為藍軍重新制定戰術方向,為球隊再次成功登上歐聯寶座,而雲拿喺歐戰既表現可以話相當亮眼,尤其喺淘汰皇馬既賽事之中,多次利用速度爆破對手防線;只要有足夠既空間,添姆雲拿絕對係一名好洗好用既球員,無論有球在腳還是無球,德國人都善於不斷透過跑動為隊友拉扯出空位,加上接近無限既體力輸出,令到好多時去到賽事八十幾分鐘都依然見到佢可以全速奔跑,對球賽既投入度非常之高,哩一點都討得唔少車迷歡心。

但同時雲拿既把握力亦令到喜歡同討厭佢既球迷兩極化,錯失機會既畫面可以話歷歷在目,同時球員亦難以適應英超賽場較常出現既密集環境,應該話車路士面對需要破密集既對手時都難以招架,更加之令到雲拿無法發揮得出自己既強項,因為根本都無空間比佢利用速度爆破,加上多次VAR推番入球,都打擊到球員既信心,亦令雲拿喺英超同歐聯賽出既表現出現分野。


選擇減薪離隊回歸RB萊比錫,對足球熱誠從未減退,實在都要感激雲拿哩兩年為藍軍既付出,無佢的話球隊都未必能夠登上歐聯寶座,一個多做事少說話默默耕耘既球員,至少都比起黎到半季都吵著要走既好,同樣是「回家」都有體面得多,絕對值得車迷尊重。


文章發表時間 : 17/8/2022 14:00
文章最後更新時間 : 17/8/2022 14:20

《原創文章 歡迎轉載 請列明出處 謝謝》
Bluexlion車迷手記 每週出文 用心寫每篇文章 給我們一個Like作支持 : https://www.facebook.com/bluexlion/
標籤: 車路士  添姆雲拿  杜曹  

留言


請按此登錄後留言。未成為會員? 立即註冊
    快捷鍵:←
    快捷鍵:→