《付出沉重代價的大屠殺︱車路士對祖雲達斯歐聯賽後感》

BluexLion車迷手記 於 25/11/2021 發表 收藏文章
《原創文章 歡迎轉載 請列明出處 謝謝》
-請支持Bluexlion車迷手記 Facebook專頁-


相信連車迷都未必估到今次小組榜首大戰最終會以哩個比數完場,車路士喺主場以4-0擊敗同組勁旅祖雲達斯,不過喺大勝背後藍軍迎來兩位傷兵包括簡迪同捷維爾,而其中後者更有機會重傷收咧,可以話為今場勝仗付出左沉重代價。

上週末重擊李斯特城後,杜曹喺今場波只作出少量人手調動,三人防線依舊維持堤亞高施華、魯迪加以及小將查路巴,隊長艾斯派古達繼續休戰,左右翼衛亦同樣保留捷維爾同列斯占士二人,而中場方面同時選用佐真奴同簡迪哩對雙中場組合,至於前線上場波有夏維斯受傷,杜曹今場波同樣安排左蒙特輪休,選用左奧岱、佩利錫以及薛耶治三人作攻堅,而美國隊長擔任中路偽9號角色。

祖雲達斯方面同樣以慣常用既442陣式應戰,不過受傷兵潮影響部份首回合主力球員都未有隨隊作客,加上杜曹悉心安排既賽前部署,令到客隊球員明顯打得非常困身,艾歷尼希望源用上回合既戰術套路,盡可能嘗試埋身封鎖藍軍既用球空間,再透過基艾沙等前場球員進行快速反擊製造進攻機會,但哩個如意算盤並不能喺今場波打響,原因正正係藍軍今場波前中後各三位發揮得出色既球員,包括薛耶治、佐真奴以及魯迪加三位喺戰術角色上完全執行到杜曹既安排。

佐真奴同魯迪加負責由後場發動攻勢,後者於右路三番四前持球壓上製造人數優勢,亦見得到祖雲達斯由於選擇人叮人埋身防守為主,吸引之下令魯迪加有大量推進空間,即使客隊選擇投放更多兵源於前場作壓迫,希望提升車路士由後場組織既犯錯機會,不過喺三中堅加上佐真奴形成菱形小組企位底下,基本上莫拉達、基艾沙等人既壓迫都係無功而回居多,再加上薛耶治多次回後到中場幫波,而對方既閘位球員什少會跟上防守,變相亦令藍軍於中路增設多一個接應點,當中薛耶治更加係今場波跑動最多既球員。

而除左以上三位戰術核心發揮出色之外,施華既護空門阻止舊將莫拉達挑射、查路巴既歐聯第一球抽射入球、列斯占士既窄角度起腳射入等畫面都令車迷們非常難忘,不幸既係簡迪同捷維爾既受傷,前者只係輕微扭傷相信並無大礙,相反捷維爾既情況就嚴重得多,喺賽後檢查証實係ACL受傷,據報藍軍會先觀察多一個月睇下傷勢有冇改善至決定會唔會選擇做手術,如果最終都選擇開刀的話休養期將長達6-9個月,換句話說將會提早收咧,尤其喺捷維爾近期既狀態相當火熱之下遇上今次意外,實在令人痛心可惜。

賽後車路士鎖定左小組出線資格,將會喺最後一場小組賽作客對聖彼得堡既賽事過後決定首名還是次名出線,不過依加首先要將專注點放番喺黎緊週末對曼聯既賽事上,希望可以繼續延續近期唔錯既走勢。

文章發表時間 : 25/11/2021 09:30
文章最後更新時間 : 25/11/2021 09:30

《原創文章 歡迎轉載 請列明出處 謝謝》
Bluexlion車迷手記 每週出文 用心寫每篇文章 給我們一個Like作支持 : https://www.facebook.com/bluexlion/
標籤: 車路士  祖雲達斯  歐聯  

留言


請按此登錄後留言。未成為會員? 立即註冊
    快捷鍵:←
    快捷鍵:→