《強強對碰收錄兩連敗 歐冠後遺症問題逐一浮現? 祖雲達斯對車路士歐聯賽後分析》

BluexLion車迷手記 於 01/10/2021 發表 收藏文章
《原創文章 歡迎轉載 請列明出處 謝謝》
-請支持Bluexlion車迷手記 Facebook專頁-


迎接連續兩場敗仗,雖然對手同為列強既曼城同祖雲達斯,但感覺始終不好受,同時當頭棒喝地將全隊由開季至今保持不敗既氣勢撲滅,認清事實及時調整,針對性處理依加所面對既問題,將會係杜曹以至全隊所要做既工作。

作客都靈從來都唔係易事,英格蘭球隊一直作客意大利都無乜太多甜頭,喺上場輸比曼城之後杜曹並無喺陣容上作出太多調整,更加由於傷兵問題令人手調動更為緊絀,列斯占士既受傷令艾斯派古達需要移上一格打右翼衛,本身右中堅既位置就由基斯甸臣出任,伙拍堤亞高施華同魯迪加為三中堅,左翼衛依舊用上馬高斯阿朗素,雙中場方面有簡迪受傷,維持佐真奴拍高華錫哩對中場組合,至於前線三人就用左盧卡古拍夏維斯同薛耶治,回復以343陣式應戰。

而同樣面對住中前場傷兵問題困擾既祖雲達斯擺出一個442陣式,安排左基艾沙同貝拿迪斯治為雙箭頭,同時派出一眾相當硬朗既工兵中場,即使喺對住主場球迷依然讓出控球權,三線球員集中於自己後半場作防守靜待時機,一等到藍軍球員傳失又或者進攻失敗之後就馬上將皮球運上前場兩名意大利人腳下製造反擊機會,而效果亦非常奏效,艾歷尼明顯針對到車路士主控既踢法針對性作出應對方案。

客隊既車路士可以話除左喺開賽頭十五分鐘同尾段最後果廿五至三十分鐘較為稍稍佔優之外,其餘時間都受制于主隊既戰術限制,即使有一啲空間可以快速製造進攻機會,但由於祖雲達斯既兩閘並無經常上前配合球隊進攻,交由左右中場負責邊線區域連接前場球員,以至後防長期有至少四名球員負責防守,再加上防守球員身前再有多四名中場包括拉比奧特同盧卡迪利等負責補位同遮線,將絕大部份空間收窄,所以你見即使盧卡古經常舉手走位入攝,但隊友都無法長傳到個波上前。

祖雲達斯亦好識得用兩名球員組合做夾擊攔截,一人負責身體對抗控球球員,而另一人就負責從後攔截配合夾擊,多次有效地打斷藍軍控球權之餘更連帶製造反擊機會,當然亦受惠於高華錫既表現失準,上半場未夠三十分鐘經已出現兩次既嚴重傳球失誤差少少釀成失球,最終車路士都喺下半場一出黎無耐宣告失守,一貫典型既半場初段不集中而被對手成功把握得到機會,其後杜曹亦相繼換入奧岱、路夫斯捷克以及巴克利等球員加強攻力,可惜最後都無功而還。

總括而言,你話車路士今場係咪打得好差?其實又算不上,但一定唔會係打得好,面對住曼城同祖雲達斯兩類型風格完全不同既對手,一方面被曼城主動搶攻佔盡優勢,另一方面就到祖雲達斯既嚴密防守主打反擊,車路士都收錄一個失球以敗仗作結,睇黎藍軍開季未正式踏入十月都已經要經歷一個小低潮了。


文章發表時間 : 01/10/2021 09:45
文章最後更新時間 : 01/10/2021 09:45

《原創文章 歡迎轉載 請列明出處 謝謝》
Bluexlion車迷手記 每週出文 用心寫每篇文章 給我們一個Like作支持 : https://www.facebook.com/bluexlion/
標籤: 車路士  歐聯  祖雲達斯  杜曹  

留言


請按此登錄後留言。未成為會員? 立即註冊
    快捷鍵:←
    快捷鍵:→