《外借六年終需一別 期望你能在意甲發熱發亮 - 柏沙歷》

BluexLion車迷手記 於 23/06/2020 發表 收藏文章
《原創文章 歡迎轉載 請列明出處 謝謝》
-請支持藍獅 Facebook專頁-


阿特蘭大正式啟動有關買斷條款,將車路士兩季借將柏沙歷(Mario Pašalić)正式買斷,據報當中買斷費用為1500萬歐元,哩位克羅地亞憑著出色既表現於阿特蘭大穩佔一席,經歷左過去六季既外借生涯後今次終於以正式轉會離開藍軍,無可否認哩單交易係對球員以至球會雙方都係三贏局面。

自柏沙歷加盟車路士後一直都只能代表球隊參與季前熱身賽,歷任主帥當中亦都無一位願意將哩位克羅地亞中場留在陣中,當日柏沙歷出道時一度被譽為「新摩迪」(Luka Modrić),除左因為大家同樣國藉同以及場上同樣位置之外,更重要既係佢兩個都係以高水平既個人技術作為賣點吸引到一眾球迷目光,亦同時令當時仲效力緊夏德既柏沙歷年紀輕輕經已受到唔少歐洲豪門所注視,最終成為車路士一員。

但現實與幻想總喺有一段距離,無人估到柏沙歷之後既時間都一直都係過住「出租車」既人球生涯,先後外借到西甲既艾爾切、法甲既摩納哥、意甲既AC米蘭、俄超既莫斯科斯巴達以及近兩季都效力緊既意甲阿特蘭大,其實柏沙歷喺當中唔少外借效力緊既球會都有唔錯既發揮,但總因為各自有唔同既原因令佢無法得到買斷既機會,例如效力艾爾切果時係成功為球隊爭取得到西甲既中游位置,但最終因球會財困而無法作出買斷,而喺AC米蘭既時間佢同樣地亦交出唔錯既成績,但正當哩支意甲老牌球會喺季尾出價求購時又遭到車路士拒絕有關報價。

直到近年柏沙歷再一次到訪意大利加盟阿特蘭大,逐步打起成為陣中既核心球員,為球會力爭歐聯參賽資格,繼而亦喺大眾更受注目既歐洲賽場上一展所長,可以話將球員推上職業生涯入面第一個高峰,而哩位克羅地亞中場無論喺踢法以及特性上亦的確幾切合得到阿特蘭大既需要,柏沙歷能夠勝任中場中以及攻擊中場兩個位置,而能夠同時以哩兩個身份上場既球員能力亦較為全面,與一般攻中不同既地方係,柏沙歷較少參於串聯上既工作,反而著眼於尋找進攻入攝空間,於兩名前鋒身後執第二點,再加上勤於跑動既踢法,亦能靈活多變地走到其他位置協助隊友,對於戰術上著重於球員之間互相補位協調既阿特蘭大主帥加斯柏連尼(Paul John Gascoigne)黎講,柏沙歷的確符合得到其需要。

而唔少車路士球迷對於柏沙歷近年搶眼既表現再一次被吸引起黎,繼而議論紛紛究竟佢能否於藍軍陣中佔一席位,甚至搶佔林伯特愛徒蒙特既攻中位置,個人認為柏沙歷的確成功適應得到其他聯賽既風格特質,交出既數據同成績亦係無容置疑,但對於佢能否符合得到英超賽場上既需求就有一定程度保留,始終擁有1米89身高既佢喺起動速度上並唔算得上快,而球員喺踢法思路節奏上亦唔善於高速運轉,能否喺強度更高既英超賽場之中維持到穩定發揮會係未知之數,而歷任主帥之中無任何一位選擇留用佢,意味住當中喺球員特性上好大機會係有一啲符合唔到需求既地方,亦暫時未見得到林伯特會將佢去取代蒙特既需要喺度。

正式轉會可以話係一種解脫,尤其係阿特蘭大有需要柏沙歷既地方,亦可以完結不斷外借既人球生涯,希望佢能夠喺意甲尋找一片天,繼續發熱發亮 。


文章發表時間 : 23/06/2020 11:10
文章最後更新時間 : 23/06/2020 11:10

《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/
標籤: 車路士  柏沙歷  阿特蘭大  

留言


請按此登錄後留言。未成為會員? 立即註冊
    快捷鍵:←
    快捷鍵:→