《外借而被遺忘的名字 青春風暴下岩柏度下季能否在林伯特手中佔一席位?》

BluexLion車迷手記 於 17/04/2020 發表 收藏文章
《原創文章 歡迎轉載 請列明出處 謝謝》
-請支持藍獅 Facebook專頁-


受轉會禁令影響,今季車路士回收左唔少之前外借既球員返黎自用,令一眾小將好似艾巴咸、蒙特終於能夠於一隊之中證明自己,話雖如此,仍有部份球員繼續成為「出租車」大軍一員,始終面對隊內個別位置競爭,上陣空間仍然有限,依舊需要透過外借去比佢地持續上陣既機會,而岩柏度(Ethan Ampadu)正是其中一位。

岩柏度出生於英國西南部艾希特(Exeter),父親為史雲斯名將Kwame Ampadu,而岩柏度自少就加入家鄉球會艾希特城市(Exeter City FC)既青訓體系之中訓練,亦係英格蘭聯賽杯史上其中三位16歲前首次亮相既球員之一,可見得自少經已存在一定足球水平,直到17年車路士至正式將年僅17歲既岩柏度帶到倫敦正式開始藍橋生涯,而唔少藍軍球迷曾誤解岩柏度為土生土長既自家青訓。

球員最為人熟悉定必係佢個標誌辮子頭,總能夠喺場上受到注視,而岩柏度同時能夠勝任中堅以及防中兩個位置,身高雖然只有一米八二以防守球員黎講並唔算得上高,不過威爾斯人擁有強勁既跳躍力以及靈活性,一啲身後波都能夠快速轉身回追,而且亦勇於落腳,再加上岩柏度亦係一位現代型防守球員,除左有一定腳下技術外亦有用球能力,長短傳火喉亦具相當水平,完全唔似一名二十歲都未到既球員。

而車路士喺今季季初將佢外借到德甲RB萊比錫,希望威爾斯人能夠喺穩定既上陣時間中成長,但岩柏度喺德國似乎過得不太如意,至今只喺德甲上陣三場,RB萊比錫主帥拿高士文(Julian Nagelsmann)較多時間都將佢放喺後備席上,亦一度傳出車路士於冬季轉會將佢回收,最終亦只聞樓梯響,不過佢亦把握到隊友受傷而喺歐聯淘汰賽對熱刺既首回合踢足全場,而且表現同數據都相當亮眼,令外界頓然醒起岩柏度哩位被大眾遺忘既車路士借將仍然留在德國賽場之中。

至於國家隊層面方面,球員同時擁有代表英格蘭、愛爾蘭、加納以及威爾斯資格,而佢亦曾經代表過英格蘭U16梯隊上陣過一場賽事,不過岩柏度最終選擇跟隨母親國藉代表威爾斯國家隊出戰,而佢亦好得到國家隊主帥傑斯(Ryan Giggs)器重,自17年2月被徵召後至今經已為紅龍上陣13場,而傑斯較傾向將佢於喺一個防守中場既位置,"He's an amazing talent and he's shown that in the games he's played." - Ryan Giggs,反而要留意既係如果國家隊同球會兩個層面各自喺兩個位置上雙向發展的話,對於佢既未來定位未必係一件好事。

個人認為岩柏度並不需急於回歸車路士之中,喺防中同中堅位置上實在未有太多空間比到佢穩定上陣,雖則RB萊比錫好大機會都唔會選擇續借威爾斯人,亦可能嘗試繼續於德甲賽場中尋找有意租借既下球隊,又或者喺英超中下游尋覓,而前題係能夠確保到有穩定既上陣時間,始終對於十九歲既岩柏度黎講實戰經驗喺佢哩個年紀黎講先係至重要。


文章發表時間 : 17/04/2019 11:05
文章最後更新時間 : 17/04/2019 11:05

《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/
標籤: 車路士  岩柏度  安柏度  RB萊比錫  

留言


請按此登錄後留言。未成為會員? 立即註冊
    快捷鍵:←
    快捷鍵:→