《意外的賽果 爆冷的勝仗 車路士對利物浦足總盃賽後分析》

BluexLion車迷手記 於 05/03/2020 發表 收藏文章
《原創文章 歡迎轉載 請列明出處 謝謝》
-請支持藍獅 Facebook專頁-


經歷喺歐聯對拜仁既慘敗同聯賽對般茅既失利,車路士黎到足總盃可以話暫時止止血,令人意外地爆冷擊敗準英超冠軍利物浦,場面上似乎有點兒格食格既味道,除左賽果之外,車路士哩邊有基柏回復正選身份、小將基爾摩亞表現備受好評以及柏度既「世界級」演出,亦係車迷們值得恩喜同注視既地方。

林伯特喺今場波作出好幾個換人調動,其實佢現有既兵源之下都無乜太多選擇,艾巴咸、奧岱、佩利錫、簡迪以及基斯甸臣受傷,而黎緊佐真奴亦因停賽需要避戰英超及歐聯賽事,今場波喺防線上復用基柏作正選,而以魯迪加拍蘇馬作雙中堅,左右二閘繼續維持馬高斯阿朗素同艾斯派古達,以中場方面就打三中場,分別係小將基爾摩亞、高華錫以及巴克利,前線就用柏度、韋利安、基奧特哩對老將組合。

雙方上半場初段都有一輪混戰,互有攻守,利物浦初時都有好幾下禁區內既黃金機會,都一一被擋出或射歪,可以話埋下左輸波既伏線,而車路士亦開始企穩陣腳,進一步提升向紅軍後場施壓既力度,柏度、韋利安同基奧特既配合可以話相當熟練,後者即使受到雲迪克挾制但亦都不落下風,場上支點作用明顯,亦令身邊既柏度同韋利安受益,多次獲得接應二傳機會,韋利安一腳射門為車路士先開紀錄,但都不及柏度全場表現搶鏡。

哩位西班牙翼鋒今場係為藍軍上陣第200場既賽事,近幾場上陣亦見得到柏度既狀態開始一步步提升,今場波無論喺進攻同防守兩端球員發揮都相當出色,多次喺後場成功帶波離開危險區域,同時喺利物浦一啲角球攻勢解圍後都多次喺中場成功喺對手身後搶到個波,再自己推大半場上前場作反擊,只係有下欠運單刀射失,如果唔係有入球的話今場既賽事最佳球員就好可能係佢。

而今場波獲得最佳球員奬項既基爾摩亞賽後亦受一眾球評家一致好評,哩位蘇格蘭小將即使面對住法賓奴等中場好手亦全無怯場,更加多次喺中場成功破壞紅軍攻勢,亦有回後幫中堅補位防守文尼,而喺進攻方面互傳配合走位現位意識上都好高,睇落表現完全唔似係一個18歲既後生仔。(可到《首次大戰正選就榮獲最佳球員奬項 此小子屬何方神聖? - 基爾摩亞》細閱球員評論)

巴克利果球世界波亦睇到利物浦防線既漏洞,紅軍下半場其實好幾下都比到車路士作出一啲致命性既反擊,由中場開始可以自己爆一段,利物浦後防球員亦明顯出現疲態,即使及後換入占士米拿、法明奴以及沙拿一眾主力,面對住車路士中場人數既囤積亦都無力回天。不過今場波亦有高華錫同韋利安傷出,前者傷勢似乎都幾嚴重,對於依加傷兵滿營加上有佐真奴停賽既車路士黎講可以話雪上加霜,只好寄望基爾摩亞以及路夫斯捷克能夠做雷霆救兵幫手救亡。

至於基柏,三連救顧然亦相當精彩,能夠以不失球完成賽事亦提升左球員既信心,林伯特賽後亦對球員表現感到恩喜,似乎基柏經歷過好幾場休息後亦整頓過自己既心態,相信黎緊林伯特都會比番基柏喺聯賽打番正選。足總盃下輪對手將會係聯賽排第三既李斯特城,不過都要集中番注意力喺黎緊星期日應付愛華頓既賽事先,林伯特要面對住車路士前領隊安察洛題,將會係另一道難關。


文章發表時間 : 05/03/2019 11:50
文章最後更新時間 :05/03/2019 11:50

《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/
標籤: 車路士  林伯特  利物浦  足總盃  

留言


請按此登錄後留言。未成為會員? 立即註冊
    快捷鍵:←
    快捷鍵:→