《轉會窗的犠牲品 未能離開車路士或成基奧特一生遺憾》

BluexLion車迷手記 於 16/02/2020 發表 收藏文章
《原創文章 歡迎轉載 請列明出處 謝謝》
-請支持藍獅 Facebook專頁-


車路士喺過去哩個冬季轉會窗除左令人意外地無作出任何收購之外,被認定為頭號離隊球員既基奧特亦未能夠喺轉會窗關閉前離開史丹福橋,意味住佢要完成埋黎緊最後哩半年合約至會以自由身離開藍軍,而同時歐洲國家盃亦即將展開,法國國家隊主帥迪甘斯其實喺今季都已經多次公開表示,如果基奧特喺車路士既處境未有任何改變的話,難以於歐國盃中參戰,有機會成為「銀河唯一」既一生遺憾。

其實本身基奧特既合約係於上季時結束,只係球會單方面啟動合約中既自動續約一年條款,而球員亦只好繼續留喺藍軍之中,但無奈地由沙利轉為林伯特接掌後,處境唔單止無改變,更可以用變差黎形容,季初其實都有一段後備上陣時間,但自從受傷後,後備席上既位置就由巴舒亞伊所取代,即使喺本土盃賽上林伯特亦選用比利時前鋒為先,大大縮減左基奧特既上陣時間,至今只為車路士喺今季上陣左282分鐘,可以話少得相當驚人。

其實「銀河唯一」並不愁無下家,無論係喺番英超還是法甲意甲,都有唔少球會都有興趣作出收購,當中誠意最大既就必定係有前藍軍主帥干地所執教既國際米蘭,而藍黑軍團亦其實一早已經同球員經理人達成協議,只係球會雙方一直未能就著轉會費用上達成一致目標,討價還價,而林伯特亦有向外界表示,只要球會能夠成功收購替補,基奧特係可以離開,但藍軍喺丹比利、卡雲尼定係最後時刻殺出黎既梅頓斯都一概無功而還,國米方面亦指車路士根本沒有誠意於交易至中。

無奈地基奧特就只好繼續喺史丹福橋渡過埋最後半季時間,既然已成事實,就只好希望球員能夠保持自身狀態,而林伯特亦盡可能安排一啲本土盃賽賽事比到哩位法國中鋒上陣,老實說巴舒亞伊同基奧特兩者都並不適合依加既車路士體系,但前者無論喺球會表現成點,都好大機會能夠入選到比利時國家隊之中,就算真係錯過左今屆歐國盃,都仲有下一次既時間,但今次就係基奧特喺職業生涯之中既最後一次,如果錯過左的話,難免會成為球員既一生遺憾。

同時依加既法國國家隊亦非常依賴「銀河唯一」既作用,如果基奧特狀態不足的話亦非常影響到法國於歐國盃既成績,當然,最終能否入選名單之中仍是未知之數。


文章發表時間 : 16/02/2020 13:25
文章最後更新時間 : 16/02/2020 13:25

《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/

標籤: 車路士  基奧特  林伯特  

留言


請按此登錄後留言。未成為會員? 立即註冊
    快捷鍵:←
    快捷鍵:→