《多次錯失黃金機會 阿朗素一箭定江山 車路士對紐卡素賽後分析》

BluexLion車迷手記 於 20/10/2019 發表 收藏文章
《原創文章 歡迎轉載 請列明出處 謝謝》
-請支持藍獅 Facebook專頁-


黎到國際賽週期後既第一場英超賽事,藍軍喺主場迎戰布魯士所帶領既紐卡素,喜鵲上一場聯賽成功擊敗曼聯全取三分,加上車路士喺國際賽週期有簡迪受傷缺陣,即使坐擁喺史丹福橋主場亦不敢放鬆,最終憑著馬高斯阿朗素一球遠射冷箭定勝負,令藍軍取得三分後再一次喺聯賽榜上將名次推高。

簡迪、基斯甸臣連同艾馬臣既受傷,可以話令林伯特既人手調配進一步收緊,今場繼續以433陣式應戰,中堅組合依然係湯姆利拍蘇馬,馬高斯阿朗素同艾斯派古達為左右二閘,至於中場簡迪缺席既位置就由巴克利頂上,主要原因應該係高華錫喺國際賽週期都有小傷,只係咁岩康復得切而林伯特唔想冒太大風險,組合佐真奴同蒙特,而奧岱、艾巴咸同韋利安就合組攻堅。

面對住實力比較弱既對手,好多時佢地都會喺開波初段嘗試谷一段拎個優勢,之後就會縮返喺自己半場以防守作主導靜待機會,不過面對住一啲鐵桶死守既陣式,林伯特今季所用既戰術的確無上季顯得咁老鼠拉龜,加強傳球速度提升比賽節奏,透過不斷以三個球員作小組互傳走位,將皮球一步步運上前場,即使兩閘壓上,亦利兩名具速度性既中堅作包位,戰術包裝下令哩隊車路士擁有比「沙利波」更完善既配套。

今場波其實都有多下黃金機會,蒙治十二碼點附近背身抽射、艾巴咸接應角球頭槌中眉、佩利錫近門射中龍以及二傳比艾巴咸半空門被對手後防擋出,哩啲畫面可以話就算過左一晚都仲記得,係欠運?還是把握力差?個人感覺似乎係前者居多,不過今場波反而想讚一讚奧岱,自佢受重創傷癒後,林伯特一直將佢由後備提升至正選位置,上位速度什至比新加盟既佩利錫為之快,而哩位已續約既英格蘭小將的確無辜負哩番好意,狀態日漸上力。

好多時除左喺左路到蒙特以及阿朗素配合之外,無論喺一啲自己持球推進殺入禁區,或者交過穿透性直線,還是交啲平線波斬入禁區或轉邊,都相當高準繩度同威脅,似乎喺夏薩特離隊後,奧岱真係會成為車路士邊線上既重要一人。至於今場波較為美中不足既可以話係基奧特仍然未有後備上陣機會,國際賽入左一球既佢如果再係咁落去的話,相信都好大機會一月轉會窗會選擇離開。

週中將會重燃歐聯戰火,遠赴荷蘭作客阿積士。


文章發表時間 : 20/10/2019 11:40
文章最後更新時間 : 20/10/2019 11:40

《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/

留言


請按此登錄後留言。未成為會員? 立即註冊
    快捷鍵:←
    快捷鍵:→