《路夫斯捷克受傷的背後 掲示車路士高層的安排失當?》

BluexLion車迷手記 於 20/05/2019 發表 收藏文章
《原創文章 歡迎轉載 請列明出處 謝謝》
-請支持藍獅 Facebook專頁-


安排友誼賽,過往都係各大球會喺季前作訓練之用,以操練球員狀態為目標,但安排於季尾收咧後至踢既情況可以話相當少有,而車路士高層更安排左哩場友誼賽於收咧後三日到美國作客新英格蘭革命,當中更令路夫斯捷克重傷無緣參與歐霸盃決賽,以球迷角度黎講哩場波絕對可以話得不償失。

其實場波一早喺季中都經已安排,果時都有部份球迷留意得到哩場波係喺英超收咧戰後馬上舉行,同時如果球隊能夠進入歐霸盃決賽的話,哩場波就會夾住左喺中間,令人聯想究竟球會係咪無打算爭逐歐霸盃。哩場友誼賽係以反猶太主義做主題,當中安排左美職球會新英格蘭革命為對手,而哩場波既收益亦用作慈善用途,其實成件事既出發點都好岩,奈何就係錯左喺舉行既日子上面,再加上有重要球員受傷收咧,而同時有歐霸盃決賽所兼顧,引致負面消息被無限放大。

賽事中亦影到車路士既班主艾巴莫域治有到場觀賞賽事,有留意開藍軍既球迷都知道油王自季初被英國政府限制批出簽証後,一直都無出現過喺史丹福橋主場,更擱置原定今季開始興建新球場既計劃,亦相繼傳出佢有賣盤既意思,今場波之所以成事相信好大程度都係油王自己既意思,至少能夠比佢喺美國同自己球隊接觸,亦可以暫時消除外界對於佢有意賣盤既消息。

當然有唔少球迷都表示,哩啲咁既友誼賽都只係觀賞性質,有咩必要安排咁多主力球員參與,老實說,球會雙方決定舉行一場波,當中所涉及既場地、收益以至細節都一早訂好,更加需要簽約為証作實,而新英格蘭革命自己喺美國當地都以車路士主要球員作宣傳,車路士必定係以正選陣容球員為先決條件,並非沙利自己話事。
不過路夫斯捷克既受傷就實在令人非常痛心,雖然手術成功但黎緊要經歷長達六至九個月既養傷期,意味住下季季初既賽事都唔能夠上陣,而路夫斯捷克受傷既位置同早前奧岱所傷既都一樣係跟踺位,即使康復後對於球員既靈活性同爆發力都有所影響,亦好容易會喺之後再整傷番同一位置,其實喺季尾時間英格蘭人都經已喺沙利手中搶佔一席位,今次受傷絕對可以話生不逢時。

依加只希望佢下季能夠強勢回歸,早日遠離傷患。


文章發表時間 : 20/5/2019 14:50
文章最後更新時間 : 20/5/2019 14:50

《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/

留言


請按此登錄後留言。未成為會員? 立即註冊
    快捷鍵:←
    快捷鍵:→