《去到了對的地方 卻遇上錯了的人 - 舒賀爾尼》

BluexLion車迷手記 於 09/05/2019 發表 收藏文章
《原創文章 歡迎轉載 請列明出處 謝謝》
-請支持藍獅 Facebook專頁-


舒爾尼,一個耳熟能詳嘅名字,如果你有留意開德國國家隊,又或者德甲聯賽,對哩個名絕對唔會感到陌生。來來回回,由德甲到英超,再由英超回流到德甲,到今季又再一次黎到英超,同樣地加盟倫敦球會,選擇效力嘅係富咸。

跌跌碰碰,舒爾尼自出道以黎大大話話都效力左六間球會,而睇得出佢嘅職業生涯自第一次離開英超之後一直都走緊下坡。當年效力緊利華古遜嘅佢可以話光芒四射,吸引到時任車路士領隊摩連奴嘅目光,將德國人帶到黎英超,而果時唔少車路士球迷都對舒爾尼抱著一定期望,畢竟德國人總係以有紀律、效率以及機動性見稱。果然,舒爾尼亦的確不負眾望,好快帶到眼前一亮嘅表現比我地。

每當球隊面對落後、失分時刻,摩連奴都會委派舒爾尼以後備奇兵嘅身份登場,初黎報到經已為車路士搶番唔少分數。即使無球在腳既時候,舒爾尼亦會配合隊友進攻走位,製造埋門機會,而且佢走啲位亦都非常「食腦」,好似永遠都走到啲空位咁,令到當時既「派牌王」法比加斯經常都提供到助攻比佢,球隊嘅進攻模式更加立體;但舒爾尼並非一名攻守兼備嘅球員,而摩連奴過往都好注重防守迫搶,即使係攻擊球員亦需要分擔球隊防務工作,就因為咁,舒爾尼嘅「熱戀期」亦都好快因為狀態低迷而消失。

仲記唔記得14年世界盃決賽,唯一入球嘅助攻係邊個?正正係由舒爾尼所交出,當時戴著世界盃冠軍光環以及關鍵助攻嘅舒爾尼返到黎車路士,表現不但未及上季搶眼,更往往喺關鍵時候令到球隊失波,之後更加因為急於表現自己,浪費左球隊唔少入波機會,而防守表現亦未合乎摩連奴嘅標準,可以話攻不銳守不穩,進退失據嘅佢最後好似跌入左一個迷失旋渦咁,最終變成球隊收購古亞達度嘅籌碼。之後先後效力禾夫斯堡、多蒙特,直到依加既市球會富咸,繼續經歷跌跌碰碰既足球生涯。

在對的地方遇上錯的人,如果當初摩連奴無賣走佢,又或者佢唔係跟著摩連奴,今日既情況又會係點呢?不過點都好,望返依加嘅車路士正正缺乏好似舒爾尼哩類型球員,無奈地實在有一點苦在心頭既感覺。

文章發表時間 : 09/05/2019 15:45
文章最後更新時間 : 09/05/2019 15:45


《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/
標籤: 車路士  摩連奴  舒賀爾尼  舒賀尼  

留言


請按此登錄後留言。未成為會員? 立即註冊
    快捷鍵:←
    快捷鍵:→