【巴籍意人】誰人才是左翼衛替補 - 艾馬臣

BluexLion車迷手記 於 02/02/2018 發表 收藏文章
-請支持藍獅 Facebook專頁-
《原創文章 歡迎轉載 請列明出處 謝謝》

.圖片來源 : Daily Star

對上一篇講關於車路士轉會動作既文章係喺截止最後一日,當時車路士仲喺收購前鋒既事宜上討價還價,慶幸最後未有出現卡路爾、高治之流。總結岩岩過去既哩一個冬季轉會窗,唔知你又對藍軍今次既轉會既三個收購滿唔滿意呢?今集先講左翼衛既新收購,艾馬臣。

左翼衛位置替補由上季講到今季,真係講到口水都乾,傳聞收購既人選一直困擾在祖雲達斯既阿歷士辛度身上,但由於藍軍一直唔想付出老婦人要求高昂既轉會費,導致轉會傳聞都係只聞樓梯響。要知道既係,自干地上任後,傳聞收購目標都多左覆蓋喺意甲範圍,馬高斯阿朗素正正係哩位意大利主帥要求由費倫天拿所引入。既然向祖雲達斯取人不成,就自然向另一支老牌球會羅馬埋手。

當時車路士有意思一氣過將迪斯高以及艾馬臣一同打包到史丹福橋,但由於前者必繫首都狼,與此同時藍軍對哩位波斯尼亞國腳開出既個人合約條款並唔吸引,因此車路士只能夠將艾馬臣收歸旗下。哩位巴西籍左閘曾代表意大利國家隊上陣,黎到藍橋後令干地手下除左薩柏哥斯達外再多一名意國同鄉。艾馬臣季前開始受傷患困擾,在長達三個多月既康復期過後一直都只能夠在後備席渡過,當中只替羅馬在一次聯賽後備上場以及一場本土盃賽踢足九十分鐘,所以離開都絕對情有可原。

艾馬臣出自巴西名門山度士,睇番上季數據,艾馬臣一共代表羅馬在各項賽事上陣接近四十場,獲得一入球及一助攻,數據上看似唔係一個相當具效率既邊路防守球員,但佢擁有速度、自身技術同充沛體力,哩幾方面要素正正係依加馬高斯阿朗素所缺乏的,而且在史巴列提帶領既羅馬底下經常使用三後衛陣式,對左翼衛有一定程度既熟悉,可以話比起剛剛外借到紐卡素既堅尼地更加全面,位置上無疑係一個非常好既補充,而阿朗素終於都有機會可以輪休一下。

現年廿三歲既艾馬臣被當地人稱為「新卡富」,雖然已經不能再代表巴西上陣,以及一貫巴西閘位球員攻強守弱本色,但相信佢喺干地手下能夠再提升多一個層次,更可能令球隊在歐聯場上走得更遠。

下集,將會講另一單收購,「銀河唯一」基奧特。

文章最後更新時間 : 02/02/2018 17:30


《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/

留言


請按此登錄後留言。未成為會員? 立即註冊
    快捷鍵:←
    快捷鍵:→