《What a game!過山車式進程 車路士對阿積士賽後分析》

藍獅 於 06/11/2019 發表 收藏文章
《原創文章 歡迎轉載 請列明出處 謝謝》
-請支持藍獅 Facebook專頁-


What a game!峰迴路轉既賽果,車路士今場賽事可以話來回地獄又折返人間,先以大比數落後,再受惠於阿積士連續兩名球員被紅牌趕離場而追平,雖然比分數上失4球實在難以令球迷滿意,但雙方各執一分可以話係對大家最公平既結局。
.
林伯特今場繼續以433陣式出戰,而唯一變動就係以馬高斯阿朗素取代上場打足剛傷癒既艾馬臣,而久未露面既簡迪都終於出現喺後備席上,似乎林伯特亦要確保球員真係100%傷癒至放佢落場,至於基斯甸臣亦同樣地現身於後備名單之中。如果以全場波黎講,兩隊可以話各自打左半場好波,上半場既車路士可以話完全比人反客為主,唔講仲以為哩場藍軍係作客緊,而阿積士亦好快憑住艾巴咸既一下烏龍球領先,而藍軍隨即亦射入十二碼追平,講緊都係開賽頭五分鐘內既事,為大比數既賽果展開序幕。
.
基本上阿積士喺控球在腳之下都幾難搶到佢波,即使拎得返個控球權,藍軍傳得一兩腳波就會斷,同時兩閘既受壓程度亦相當嚴重,阿積士球員經常喺兩條邊線over load車路士兩閘,出現三打二既情況,尤其係對馬高斯阿朗素既一邊就更加嚴重,西班牙人明顯喺體力充沛既時候都比對手係咁舞,之後轉果球都係比對手輕易喺左路出波入禁區頂入,不得不令林伯特喺落後1-3既賽果後半場就換入占士取代。
.
下半場一出返黎其實車路士都拎返唔少控球權,場面上同上半場可以話天與地之別,而蘇馬果下由後場推到對手禁區再射埋果下更加令主場球員拍爛手掌,當然喺最後一射方面如果能處理得較好就更加完美,雖然再度被對手領先,但憑著艾斯派古達門前射入追近比數後,藍軍士氣愈演愈烈,而阿積士亦好快有兩名球員被逐,令車路士喺11打9之下取後唔少攻勢,最終追平比數。
.
車路士防線問題自開季至今一直都存在,今場波除左艾巴咸同基柏哩兩個烏龍球可以話欠運之外,另外兩球都係防守球員跟甩人所造成,中場方面蒙特今場波亦比較靜,好多時都依靠高華錫既個人推進能力揹起全隊既攻擊線,相反半場換入既占士表現相當生猛,速度、身位、前插時機樣樣有,更為車路士喺禁區內直線抽入一球,而亦要讚一讚林伯特手起刀落既換人,半場見到唔對路阿朗素比人舞到一幢都無,即刻換入好氣好力既占士放艾斯派古達頂左邊,美中不足既係其實可以再早少少換入巴舒亞伊,始終面對住打多兩個人既優勢時係可以再用盡多啲。

而同組另一場賽事華倫西亞亦大勝里爾,令哩組喺賽後出現車路士、阿積士以及華倫西亞三隊同樣各執七分既情況,黎緊仲有兩場賽事真係缺一不可,就睇下邊隊能夠笑到最後。


文章發表時間 : 6/11/2019 14:30
文章最後更新時間 : 6/11/2019 14:30

《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

標籤: 歐聯  車路士  阿積士  林伯特  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→