《點評艾斯比利古達於歐國盃表現》

藍獅 於 04/07/2021 發表 收藏文章
《原創文章 歡迎轉載 請列明出處 謝謝》
-請支持Bluexlion車迷手記 Facebook專頁-


歐國盃四強全數誕生,令人意外既係貴為大熱門既法國經已出局,意味住簡迪、基奧特等人無緣競逐奬項,而另一支勁旅德國亦同樣出局,不過喺四強之中各支球隊都有車路士球員在列,亦即係至少有一名球員能完成全季歐聯及歐國盃大滿貫。

四強當中包括英格蘭、意大利、西班牙以及丹麥,哩四支球隊之中其中三支經已喺早前都介紹過,今次反而抽埋無講過既西班牙出黎分享下,鬥牛國今次選入艾斯比利古達,個人認為唔多唔少同藍軍勇奪歐聯冠軍有關,加上貴為國家隊正選既皇馬右閘卡華查今季斷斷續續受傷患困擾,艾斯比利古達入選可以話能夠提供到左右二閘既選擇性。

不過輪國家隊經驗黎講,其實隊長喺國際賽既履歷並唔豐富,即使早幾年入選亦以後備身份居多,不過隊長既勇態似乎喺今屆歐國盃亦得以延續,更成功取得一個入球,開始奠定正選席位。

但以融合度黎講,西班牙相對其餘三支球隊黎講較為失色,以傳控見稱既西班牙缺少以往明星陣容,選入唔少年輕球員加上個別年過三十既舊代球員,除左艾斯比利古達外亦有泰亞高艾簡達拉、佐迪艾巴、布斯基斯等,安歷基目的似乎都希望能夠以老帶新。

由於國家隊既操練時間較短,新面孔同上舊有球員都需要透過賽事提升合作性,而英格蘭、意大利以及丹麥既陣容都早已夾慣夾熟,西班牙難免會比下去,不過最重要既係每名球員都有為國效力既初心,加上今屆賽事都經已出現唔少冷門賽果,誰得走到最後成為冠軍,都依然係未知之數。

文章發表時間 : 04/07/2021 13:00
文章最後更新時間 : 04/07/2021 13:00

《原創文章 歡迎轉載 請列明出處 謝謝》
Bluexlion車迷手記 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

標籤: 車路士  西班牙  艾斯派古達  

留言


請按此登錄後留言。未成為會員? 立即註冊
    快捷鍵:←
    快捷鍵:→