《「飲水哥」的豪門夢 一季就醒?》

藍獅 於 26/05/2018 發表 收藏文章
《原創文章 歡迎轉載 請列明出處 謝謝》
-請支持藍獅 Facebook專頁-

.圖片來源 : tribuna.com

車路士除左主帥位置未有定案之外,一眾今季上陣機會唔多既或長期後備球員都紛紛傳出會離隊他投,今集想講既係其中一位季初先至加盟既球員,就係由李斯特城加盟既「飲水哥」真禾特。

先睇番佢既數據,季初受傷直到10月尾先至復出,全季只為車路士喺各項賽事上陣過22場,射入一球,睇番黎講上陣時間並唔多,但其實好多時真禾特都係操練時受傷,傷癒後亦需要好一段時間提升競技狀態,引致上陣時間唔能夠維持穩定性亦可以話情有可原。其實自林伯特、艾殊利高爾、泰利等傳奇相繼離開藍橋後,車路士主力之中就只係淨底加利卡希爾為純英格蘭本土球員,係就係仲有法比加斯、摩西斯同一堆青年球員叫做頂住個本土名額,但球會都需要為英人元素作出補充,所以喺今季「飲水哥」既加盟好大程度係關乎到佢有英人名額。

貴為李斯特城15-16年球季以夢幻式勇奪英超冠軍功臣之一,以果季既重要性黎講真禾特絕不下於簡迪,自後者離開後,「飲水哥」就成為狐狸軍團既第一防中,為防線前提供最後一道保護線,亦因為咁引致到佢無論喺各項賽事既入球同助攻數字上都大大比起「奪冠年」為少。雖則李斯特城喺聯賽同歐聯都唔能夠延續亮眼成績,但真禾特依然保持一貫平穩水準,實在係中場重要一員。

自季初轉會窗起都經已開始傳出車路士會收購真禾特,由開始直到最後真係官宣果刻,加上3500萬鎊既轉會費,外界都一直有聲音指出哩位曼聯青訓未夠班,無可否認,以「飲水哥」既級數黎講真係唔算得上一線,但車路士在缺乏英人下,加上要喺向來普遍名大於實既英格蘭搵番一個具質素既本土球員並唔易,真禾特攔截能力同中場串聯技巧經已算得上中上級,與簡迪之間既默契無需懷疑,加上法比加斯年紀已經唔輕,再唔能夠過份依賴佢去組織攻勢,真禾特既長傳視野絕對能夠喺西班牙人缺陣下對球隊戰術上既影響減到最少。

如果球會選擇賣走「飲水哥」的話,咁當初買佢番黎既原因,就真係濫芋充數?「飲水哥」的豪門夢真係一季就醒?

文章最後更新時間 : 26/05/2018 09:30


《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

標籤: 車路士  真禾達  真禾特  飲水哥  

留言

會員
我要評論
請按此登錄後留言。未成為會員? 立即註冊
  • ericsaintmartin
    ericsaintmartin 於 26/05/2018 評論 NO. 1

    飲水而家咁易傷,唔多唔少都係因為96至97上半季李斯特城全隊低沉,幾乎只係靠飲水和卡斯柏舒米高撐住整隊波。嗰一季去到季中飲水愈踢愈燥猛食牌,其實已經顯示佢有傷在身力不從心。希望佢養好傷勢繼續打拼,以飲水嘅質素,喺中型班要攞到主力中場嘅位置其實唔難。

  • OhMyGirl_Arin
    OhMyGirl_Arin 於 26/05/2018 評論 NO. 2

    傷多過踢 宜家仲有價就好快d賣

快捷鍵:←
快捷鍵:→