《青春風暴已到「撞牆期」 林伯特應如何帶領車路士走出困境?》

藍獅 於 21/01/2020 發表 收藏文章
《原創文章 歡迎轉載 請列明出處 謝謝》
-請支持藍獅 Facebook專頁-


可能有人會對車路士需要走出困境哩個形容有啲保留,畢竟藍軍依加哩一刻喺聯賽榜上既排名依然身處前四之中,但唔能夠否認既係即使有魯迪加復出,車路士防線依然繼續出現失波情況,再加上前線欠缺穩定入球輸出,令全隊都處於攻不銳守不穩既狀態,如果唔係身後其他對同樣不穩失分,相信藍軍早以排除於前列之外,林伯特該如何帶領車路士走出依加既困境?

由開季至今,林伯特主要源用於沙利以及干地既戰術怖置作大方向指標,而內容上就加以微調細執,例如喺季初加強左前線以及側擊球員既三人小組互傳以及傳球速度,球速上比起上季沙利執教時節奏更明快,希望透過速度拉開空間避免出現老鼠拉龜情況,的確收到唔錯效果;而即使運用干地所用打開既三後衛陣式時,亦加強左右中堅於中場位置既覆蓋面,令唔少波喺對手禁區閂番出黎既時候都能夠第一時間再次獲得控球權,當然仲有其他被林伯特加以改善既細位未能一一盡錄,不過睇到林伯特的確喺戰術怖置上係花左唔少心思。

而人腳上林伯特除左繼續保留一班老臣子就好似艾斯派古達同韋利安之外,亦起用多位年輕球員更將佢地提升至戰術核心地位,艾巴咸以及蒙特哩對組合可以話係林伯特手中最重要既兩位球員,前者作第一支點角色在前場開路,嘗試搶第一點為球隊在前場爭取優勢,而後者除左為艾巴咸提供身後支援作輔鋒角色外,亦會經常到邊線協助韋利安及佩利錫,配合兩者進行小組式推進,同時亦需要連接中後場串聯,兩位球員喺林伯特既戰術體系當中基本上係不可或缺。

奈何年輕球員好多時順風順水既時候都能打出一段亮眼既表現,而一股衝勁亦會令佢地喺喺比賽既體能流放方面難以收放,同時一跌入低潮既時候亦難免顯得急進,喺比賽中既判斷以及思路難免受到影響,欠缺輸出穩定性,亦令車路士前線開始出現啞火。而中場組合方面,林伯特為左加強上季沙利戰術中對於禁區頂區域既攻力支援,位置上蒙特佔一席位之下,難免只能簡迪、高華錫以及佐真奴三人之中取其二,但喺組合上依然未能發揮得到最大效果。

除左係因為林伯特對於蒙特過份依賴之外,佢對簡迪既運用亦都非常執著,尤其係近哩兩場波法國人即使上場受傷缺陣黎到今次復出亦馬上得到正選一席,反觀高華錫就連續兩次後備連上陣時間都無,同時林伯特對於簡迪喺場上既運用亦處於膠著位置,面對於需破密集既對手時出簡迪實在難免令佢既功能同位置顯得相當尷尬,再加上哩位世界盃冠軍核心成員今季經歷唔少傷患,理應要多加休息唔能夠長時間比佢應付日接日既賽事,林伯特理應攤分番多啲上陣時間比高華錫先更為合適。

而後場方面唔想花太多篇幅去講,「死症」問題除左買人之外短期內都唔會做到啲咩改變,即使回購艾基亦未必能夠即時作出明顯提升,而市場上可提備更有質素既選擇亦唔多,所以球迷著眼點並無需注視於收購後衛之上,倒不如專心一意搞好個中前場提升一下個入球數字仲好,前場既後備球員無法為球隊於後備上陣時達到變奏效果,除左因為個別球員能力外,林伯特所安排球員上陣既時間同次數亦係值得斟酌既地方,就好似柏度咁,好多時可以嘗試比佢上陣操番好個態既時間又唔用,寧願唔換人用死一班同一班正選打到尾,到真正要用柏度既時候球員個態明顯未得,但狀態同上陣時間有絕對掛勾,再加普利錫經常受傷,其實係有必要操好柏度佢,而唔係等到臨時臨急先推球員出黎之後無表現時就話佢無貨交,實在有啲本末倒置。

而同時林伯特喺中場同後場既核心位置人選組合依然未確定,開季至今都已經經過半季時間,但中堅組合依然經常變換,魯迪加鐵膽走唔甩,但佢個正選拍檔就仍然未定,就好似季初至今一直長居後備席上既基斯甸臣係去到近日轉會窗開番有傳AC米蘭想要佢,林伯特先開始拎番佢出黎用連續兩場正選,而將蘇馬放回後備席上,雖然每位中堅都各自有唔同問題,但長時間喺組合上既變換尤其係中堅哩啲球隊核心位置難免更容易出現不穩,而中場位置亦係出現同樣情況。

林伯特的確想利用一班年輕小將作核心班底推動佢地進步,但有時候亦要避免執迷不悟忽略左球隊既平衡,唔少有經驗既球員都能夠以以老帶嫰既方式帶領小將成長,過度揠苗助長無論對個別球員同球隊都有著不良影響。理性地講以林伯特既經驗同能力能夠帶領到依加哩隊車路士有依一刻高度同成績並非容易既事,但如果佢係希望能夠再為車路士作出進一步提升的話,除左買人之外其實喺好多戰術內容以及用人調配上都可再作改善,而同時加以活用換人名額避免浪費,讓一眾後備席球員除左操好個態之外亦能同場上較為重心既球員夾多啲時間,都絕對可以為球隊帶黎正面幫助。


文章發表時間 : 21/01/2019 11:25
文章最後更新時間 :21/01/2019 11:25

《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

標籤: 車路士  林伯特  

留言


請按此登錄後留言。未成為會員? 立即註冊
    快捷鍵:←
    快捷鍵:→