《重返班拿貝還是留效史丹福橋 高華錫應何去何從?》

BluexLion車迷手記 於 25/06/2019 發表 收藏文章
《原創文章 歡迎轉載 請列明出處 謝謝》
-請支持藍獅 Facebook專頁-


6月30日,可以話係高華錫決定下一站既分水嶺,事關如果果日之前車路士都唔決定出價買斷佢的話,變相哩位克羅地亞中場就會回復皇馬球員身份,藍軍喺哩一日之後即使出價亦無法為球員重新註冊,但直到哩刻為止皇馬仍然未收到有關報價,似乎高華錫既英超之旅好大機會就此完結。

回顧番岩岩哩一季,車路士高層喺巴卡約高同高華錫哩一出一入既操作上得出既效果其實相當理想,論實力,後者雖然未算得上世界級球員,但對藍軍黎講佢既能力同質素都可以話幾出眾,擁有強悍既護波能力以及身體對抗性,實而不華既突破,同時能夠控球在腳推進好一段距離,加上果斷既攔截同出色既預判能力,絕對比巴卡約高全面。

而沙利喺季初亦相當重視高華錫,三中場內大多數用佢拍簡迪同佐真奴,而及後時間亦曾經嘗試過作為後者既替補,表現都算唔錯,老實講其實市場上都比較難搵到擁有同高華錫相同特質既中場球員,以佢能力無論邊個係領隊都能夠喺各大聯賽列強之中取得一席位,所以都唔明白點解車路士到依加都仲未出手。

對於施丹黎講,高華錫其實都早已不在來季組軍版圖之中,今夏皇馬重金禮聘左多位有份量既球員加盟,喺龐大既支出同人手過剩底下「瘦身」可以話係勢在必行,所以銀河艦隊願意將高華錫出售,並標價為4000萬歐元,而由於克羅地亞人既租借合約將於黎緊6月30日完結,同時藍軍受制於轉會禁令所影響,下季都無法為新球員註冊,換句話說如果車路士真係有意買斷佢的話,就必定要喺黎緊哩五日內完成哩單交易。

只要過埋今個星期,一切都會揭曉。


文章發表時間 : 25/06/2019 14:45
文章最後更新時間 : 25/06/2019 14:45

《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/
標籤: 車路士  高華錫  沙利  皇馬  皇家馬德里  施丹  

留言


請按此登錄後留言。未成為會員? 立即註冊
    快捷鍵:←
    快捷鍵:→