《追逐金錢而放棄名聲 有一種唏噓 叫奧斯卡》

藍獅 於 09/06/2020 發表 收藏文章
《原創文章 歡迎轉載 請列明出處 謝謝》
-請支持藍獅 Facebook專頁-


奧斯卡,一個車路士球迷們看似熟悉但感覺又較為陌生既名字,哩位前巴西國腳曾經喺史丹福橋渡過左近五個賽季,一共為藍軍贏得一次歐霸盃冠軍、兩次英超冠軍以及一次足總盃冠軍,並於17年處於盛年之年既時候選擇離開歐洲賽場轉投中超,為金錢而放棄一切名聲以及為國效力既機會,淡出受球迷們所注視既目光之中,依加睇番轉頭亦難免有一份唏噓感...

車路士於12年成為歐聯冠軍後,一改過往鐵血作風,於各大聯賽搜羅一眾具潛力及質素既技術型球員,而奧斯卡就以早前U20世界盃決賽奠定勝局既冠軍級表現,吸引到多支列強所追逐,最終佢選擇連同夏薩特、馬高馬連(Marko Marin)等人一同加盟車路士,哩名巴西攻中雖然自出道以黎一直都只係喺國內打滾,加上身型亦較為單薄,不過並未影響到佢適應英超既節奏,明顯具備普遍巴西球員都少有既歐洲式踢球風格。

奧斯卡善於跑動入攝,具有遠射野心,覆蓋前場面積廣闊,再加上判斷形勢思路清晰快捷,能夠果斷地喺傳、射、控三者之間作出選擇,而其中最為經典既入球定必喺於歐聯賽場面對住祖雲達斯時以一記世界波笠死門神保方,畫面可以話仍然歷歷在目表現技驚四座,而同時與馬達、夏薩特合組名為「mazacar」既進攻三核,哩對組合無論喺進攻方面既流暢度同可觀性都可以話係近十年黎最高,亦為奧斯卡帶黎自登陸歐洲球壇以黎第一個錦標 - 歐霸盃。

可惜既係正喺哩個時候車路士再一次搵黎前任主帥摩連奴回歸執教,將馬達由三核之中拆走換入戰術執行力更強既韋利安,同時所有進攻球員亦要攤分防守職責,而奧斯卡較為獨有既進攻靈性亦隨住時間流逝而慢慢被抺去,取而代之既就只係工兵式思路,雖然最終都為佢贏得英超以及足總盃雙料冠軍,但無論係球迷們還是奧斯卡本身都開始慢慢忘記左自己曾經係一位具備進攻天賦既球員,徹徹底底地變成左一名不折不扣既中場工兵,最終亦喺收到中超巨額報價之下選擇黯然離開。

有人話奧斯卡因為追逐金錢而放棄本身繼續擁在歐洲球壇踢波既機會,與此同時其實球員都經已失去當日出道亮眼既光芒,與其係咁早日到中超掘金為家人未來提供更好既生活環境亦屬無可口非,而同時好似同鄉保連奴(Paulinho)咁隨時回歸歐洲既例子亦大有人在,更何況依加既奧斯卡都只係二十有八,未來會否再一次回歸主流球壇目光?就要睇球員本人自己既取向決定....


文章發表時間 : 09/06/2020 11:40
文章最後更新時間 : 09/06/2020 11:40

《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

標籤: 車路士  奧斯卡  巴西  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→