《車迷有感》迪亞高哥斯達絕無必要自毀前途 鬧劇也許是時候終結

藍獅 於 19/08/2017 發表 收藏文章
-請支持藍獅 Facebook專頁-
《原創文章 歡迎轉載 請列明出處 謝謝》

話咁快轉會窗就得番唔夠半個月既時間,今次哩編文章既主題並唔係同大家講黎緊車路士仲有咩轉會動作,而係就著今個轉會窗一直不間斷有新聞推出既風雲人物,迪亞高哥斯達既鬧劇之我見。
.圖片來源 : Nigeria News

有留意開小弟文章既朋友都知道,由上季季中轉會窗中超既轉會風波開始,我都一直支持球隊留下哥斯達,主要原因係自傳奇前鋒杜奧巴離開藍橋之後,所羅致番黎既替代者都未能為球隊發揮得到最大效益,不論帥位易主、戰術點變都好,前鋒都需要擁有背著對手護波能力極強既能力,在藍橋向來倚重雙翼進攻既戰術體系,擁有哩項技能可以話絕對需要同殺食,接球後再分邊進行配合攻門,或背著龍門直接抽身起腳,已經能完成一次進攻,行之有效。繼而無論費蘭度托利斯、伊度奧或是丹巴巴亞都唔係打哩家波既前鋒,引致迪亞高哥斯達既出現令球迷對佢都寵愛有加。
.圖片來源 : talkSPORT

但正所謂「一朝天子一朝臣」,摩連奴能放縱你,不代表干地也能夠容許你,雖然意大利人既戰術風格新穎,但行事作風跟以往舊派名帥一樣,以鐵腕手段要求球員有效執行指示。上季初段哥斯達曾在場上表現出不妥干地調動既動作,而賽後哩位車路士新帥亦有表示主帥擁有最終決定權,明顯兩人早已有心病。估唔到去到季尾就黎一個「大灘牌」,球員公開表示收到主帥短信,指出自己下季不在球隊計劃之中。
.圖片來源 : Daily Mail

由迪亞高哥斯達向傳媒大眾開口講既一刻開始,其實已經沒有可轉彎既餘地,球員公然主動開火炮轟球會和主帥,那管炮轟既唔係干地,但相信當今球壇上都唔會有一位主帥能夠容忍到哩件事情發生。而球員一直在巴西避世,只係透過一啲訪問新聞與干地隔空罵戰,並且要求球會放人好讓佢重回馬體會效力。到近日車路士官方要求哥斯達需要番回倫敦,重新操練狀態,繼續被佢拒絕。
.圖片來源 : TheNET.ng

轉會窗餘下唔夠半個月既時間,其實球會沒有必要為迪亞高哥斯達而著急,始終球隊已經成功羅致得到莫拉達,即使未必能夠即時乎合戰術需要或要過渡期,但總比留下哩位「麻煩友」為妙。如無意外球員將會繼續向會方拖加壓力迫使放人,雖然最終有可能兩敗俱傷,但哥斯達其實正在自毀前途,假設最後未能如願加盟馬體會,一係留在預備組作賽,一係繼續在巴西避世,但半季的空白期,無論狀態同能力都仲能唔能夠保持喺一個高水平之下,實在係未知知數。
.圖片來源 : Sky Sports

喺星期日對陣熱刺既賽前記者招待會時,干地再受到記者訪問關於哥斯達既事,而意大利人一反常態以笑面回應,並指出一切已經是過去式,係時候終結了。哩場鬧劇亦係時候告終,如果哥斯達仲想入選大國腳的話,就乖乖地聽從安排,與球會對著幹,最終只會得不償失。

條路自己揀...

對陣熱刺既賽前記招有關哥斯達片段 :https://www.youtube.com/watch?v=WvTkpnV7F5Y

《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

標籤: 迪亞高哥斯達  車路士  干地  

留言

會員
我要評論
請按此登錄後留言。未成為會員? 立即註冊
  • Marjill
    Marjill 於 19/08/2017 評論 NO. 1

    干地自己都諗住教唔長。

  • kinfung
    kinfung 於 19/08/2017 評論 NO. 2

    你不仁我不義 講經咩

  • Kaner
    Kaner 於 19/08/2017 評論 NO. 3

    睇見干地個樣,你係哥斯達都唔會同車仔和解啦

  • Wai Kei Chan
    Wai Kei Chan 於 19/08/2017 評論 NO. 4

    干地其實冇咩問題,又唔見佢教祖記時有甘既問題,問題係出自球員態度問題

  • cchi
    cchi 於 19/08/2017 評論 NO. 5

    哥斯達其實冇咩問題,又唔見佢踢馬體時有甘問題,問題係出自教練管理問題

  • billylee0722
    billylee0722 於 20/08/2017 評論 NO. 6

    夾硬要賣人去中超,係車路士的問題

  • 李奧152
    李奧152 於 21/08/2017 評論 NO. 7

    哥斯達不嬲都有問題,由佢巴西入藉西班牙就開始喇!勁還勁,無品食屎啦bybye!

快捷鍵:←
快捷鍵:→