《車路士下半季的失蹤人口 - 艾馬臣》

藍獅 於 07/03/2020 發表 收藏文章
《原創文章 歡迎轉載 請列明出處 謝謝》
-請支持藍獅 Facebook專頁-


車路士近期一直受到傷兵問題困擾,簡迪、艾巴咸、佩利錫到較近期既高華錫同韋利安相繼受傷,林伯特手中可用既球員經已捉襟見肘,相信亦係令佢非常頭痛既問題,反而有一名球員並無任何關於傷病既消息傳出,亦有參與近期球隊每一場操練,不過就連後備名單都無佢份,今次想講一講下半季既失蹤人口 - 艾馬臣。

哩位巴藉意人兩年前冬天由羅馬轉投車路士,與基奧特同期登陸史丹福橋,喺踢法上艾馬臣係一貫典型巴西閘位球員既特質,喜歡前插助攻,同時具備技術與速度,不過喺戰術執行力上亦會係偏攻強守弱,而防守能力亦相當一般,好多時都係依靠中場隊友既覆蓋面或者左中堅幫佢補位。自加盟以黎經歷過干地、沙利去到依加既林伯特執教,比較上係上任既沙利用得比較多。

艾馬臣上季初受到嚴重既傷患困擾,導致佢缺席左整個上半季賽事,復出後沙利亦一步步提供更多上陣時間比佢打足全場,始終與同一位置既馬高斯阿朗素相比,艾巴臣喺速度同體能上存在相當大優勢,對於上季沙利所要求較著重於快速反擊既戰術,哩位意大利左閘的確會啱佢心水多啲,無奈阿朗素既速度實在太慢,年紀上亦不能再強求佢再做到任何提升。

而自林伯特今季上任後,季初佢的確如球迷預期選用艾馬臣作首選,即使經歷少許傷患缺陣幾場,到復出之後亦馬上重回正選之中,但自從進入2020年後,林伯特喺左閘位既配置上開始選用隊長艾斯派古達哩位後場通天老倌充當左閘,再到近期開始後任馬高斯阿朗素到左閘正選,而艾馬臣就如失蹤人口一樣在名單上消息得無影無蹤。

喺戰術上黎睇,以艾斯派古達充當左閘並非一個長遠方案,隊長喺攻守兩端的確係比足百二分力付出,但佢始終並非一名可以兩隻腳都出波既球員,無疑會令球隊喺戰術上缺少左邊線助攻既能力,而馬高斯阿朗素喺體力上亦難以應付密度過高既比賽,再加上佢亦係一名相當容易拎牌既球員,雖然近兩場都有入波為球隊擊敗熱刺以及戰和般茅,不過個人認為都唔可能太過倚重於佢。

今季車路士喺左閘位置上的確無一個較值得信任既人選,艾馬臣同馬高斯阿朗素都各自都有唔少個人缺點,就算點講都好哩兩名球員都非可長遠信賴既左閘人選,相信今季過後哩個位置都係需要一個新收購黎切合番林伯特既戰術需要,不過喺賽季完結前車路士都仲有接近十多場賽事要應付,亦唔可能一直依靠體能不足既阿朗素去應付哂餘下賽事,一個唔覺意佢受傷的話,到時先選擇用一個雪到硬哂既艾馬臣,咪就會犯番好似同對柏度一樣既錯只會重蹈覆轍,林伯特理應開始要分配多一啲時間比艾馬臣去重拾狀態。


文章發表時間 : 07/03/2019 10:40
文章最後更新時間 : 07/03/2019 10:40

《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→