《西維爾有意外借巴卡約高 法國人應何去何從?》

BluexLion車迷手記 於 23/07/2018 發表 收藏文章
《原創文章 歡迎轉載 請列明出處 謝謝》
-請支持藍獅 Facebook專頁-

.圖片來源 : Football365

根據外國傳媒報導,西甲球會西維爾有意向車路士租用巴卡約高一季,並希望以先租借後買既形式將哩位前摩納哥中場收歸旗下,而言沙利上任後馬上向球會提出收購舊部佐真奴,喺藍軍中場人手過剩之下似乎有球員離隊亦會係意料之內,但要走先一步既竟然係巴卡約高而唔係「飲水哥」真禾特?

加盟一季時間,巴卡約高既表現可以話比人「彈多過讚」,上季最經典一戰一定要數到喺對屈福特既賽事入面,哩位法國中場只係踢左半個鐘就兩黃一紅被逐,導致球隊在整場比賽長時間打少一人,埋下大敗既伏線,災難性表現更令當地球迷即場高唱"You fxcking shit~",可以話成為眾矢之的。

「錯就要認 打就企定」,無可否認既係喺過去哩一季大家都睇到,巴卡約高既個人技術係有一啲顯眼問題存在,就連藍軍名宿林柏特都講過,當每次法國人拎波後都會選擇推腳,而唔係先控定個波以護波為主,但由於好多時個波都「唔痴腳」又或者「控甩左」,導致唔少對手都能夠成功喺佢背後「打荷包」,而隊友簡迪即使能夠覆蓋更多海洋面積,都總唔能夠次次靠佢「執漏」單天保至尊。

同時巴卡約高明顯對於英超既節奏以及裁判既執法標準依然唔熟悉,出腳時機不當經常被吹罰,可能就係因為咁,引致下半季干地要將佢推番入「冷宮」而用返法比加斯上正選既主因。依加佐真奴嚟左,無疑令巴卡約高既上陣時間進一步萎縮,同時沙利指出車路士中後場人手缺乏質素,睇嚟佢會繼續喺哩啲位置上補強,如果咁的話喺中場方面巴卡約高同真禾特都只會雙雙離開。

唔能夠否認巴卡約高係有潛力,但喺依加哩個階段真係連「周身刀」都未有,就連話佢「冇張利」既機會都冇,既然仲未成熟的話外借修煉都未尚唔係一個好辦法。

文章最後更新時間 : 23/07/2018 17:00

來源 : Tribal Football


《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/

留言


請按此登錄後留言。未成為會員? 立即註冊
    快捷鍵:←
    快捷鍵:→