《被破金身的三連勝 錫菲聯對車路士賽後分析》

藍獅 於 09/02/2021 發表 收藏文章
《原創文章 歡迎轉載 請列明出處 謝謝》
-請支持Bluexlion車迷手記 Facebook專頁-


三連勝、四場不敗、一球失球,杜曹上任後繼續延續強勢,話雖如此同樣面對住近期強勢既錫菲聯,車路士喺今場波踢得一啲都唔好受,更可以話係近四場以黎面對住身體對抗同壓迫最為持續既一場,相信今場亦可以為杜曹帶黎一啲值得考量既地方。

喺賽程頻密之下今場波繼續喺前場上進行輪換,安排基奧特領軍伙拍添姆雲拿以及蒙特作攻堅,而中場方面依舊維持高華錫拍佐真奴哩對中場組合,右翼衛亦保持列斯占士作正選,相反左翼衛終於繼對狼隊一戰後用上捷維爾,而三中堅方面就由基斯甸臣替代受傷既堤亞高施華,配合魯迪加同艾斯派古達合組防線,而剛傷癒復出既蘇馬就繼續先任後備。

佩利錫因家庭理由缺陣,相對之下較令人意外既係薛耶治自狼隊一戰後一直都未有上陣機會,未知是否因為賽程頻密加上近兩場對手相比下較為硬朗風格有關,錫菲聯近期相繼於前列對手身上取得分數,今場同樣地亦無放棄喺得分既機會,自開賽後一直維持高強度壓迫,加上三線連接緊密以及球員企位遮線相當得宜,令車路士並唔能夠輕易地製造到進攻空間同機會,可以話踢得相當困身。

相對上上半場較為側重於左路攻勢,由捷維爾、蒙特以及添姆雲拿三人於邊路士互動配合,右路就較為平靜,而首個入球就正正係由佢地三個發動並完成上半場少有既攻門機會,直到下半場換入馬高斯阿朗素及奧岱之後,攻勢就由左路轉移到右路,明顯地睇到錫菲聯成功地限制到藍軍近幾場波都能平衡地使用左、中、右三路發展既攻勢;魯迪加同文迪既誤會令前者擺烏龍,不過添姆雲拿亦馬上博得十二碼由佐真奴射入奠定勝局,而及後時間杜曹亦換入簡迪轉打532陣式。

簡迪入場後除左成功鞏固中場既操控優勢之外,同時亦能減低對高華錫既推進消耗,之前都有講過後者體能仍然不足以完全維持九十分鐘輸出,而杜曹亦明顯地減少簡迪參與進攻既責任,專心地維持中場掃蕩以及向前推進,其他項目就交由相應隊友去處理,感覺上雖然只有三位中場球員不過都能夠於杜曹手底下得出唔到效果變化。

雖則最終全取三分,但係今場波可以話係被限制最多既一場,而球員亦唔能夠較為舒適同流暢地去完成一個攻勢,節奏亦比起近幾場波為慢,相信會比到杜曹一啲構思上既考量空間,為接下來歐聯戰火重燃作準備。

文章發表時間 : 09/02/2021 11:00
文章最後更新時間 : 09/02/2021 11:00

《原創文章 歡迎轉載 請列明出處 謝謝》
Bluexlion車迷手記 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

標籤: 車路士  錫菲聯  杜曹  

留言


請按此登錄後留言。未成為會員? 立即註冊
    快捷鍵:←
    快捷鍵:→