《老將續約有如強援加盟?當中還是內藏玄機?》

藍獅 於 14/06/2021 發表 收藏文章
《原創文章 歡迎轉載 請列明出處 謝謝》
-請支持Bluexlion車迷手記 Facebook專頁-


歐聯決賽過後,大部份國家隊球員經過短暫休息過後經已馬上向國家隊報到,而球會亦在休季期間開始為來季做準備,近日車路士宣佈先後為杜曹以及堤亞高施華、基奧特續約,較令人意外既係球會竟然同近日傳出轉會消息將會加盟AC米蘭既「銀河唯一」續約,實在令唔少球迷感到驚喜。

杜曹同施華既續約可以話係意料中事,當中德國主帥喺季中簽約時條款經已列明如果取得歐聯冠軍將會啟動續約,即是未有有關條款,以杜曹上任至今帶領車路士既表現再加上球隊戰績,相信即使未能成功奪得大耳朵盃球迷亦對佢續約並無異議,至於施華早於季尾決賽前經已傳出續約消息,喺今季亦睇到年齡對於哩位巴西老將只係一個數字,帶到比球隊既經驗同能力先至係重點,絕對值得再獲一年合同。

相反基奧特既情況就較為意外,自杜曹上任後確立左夏維斯於中鋒位置,更會適時於主打反擊時安排添姆雲拿擔任箭頭,變相大大壓縮左基奧特既上陣機會,即使有得後備上陣參與時間亦都唔多,而自季尾階段同時傳出意甲AC米蘭有意收購既消息;而近幾季車路士都偶有同紅黑軍團進行交易,其中今季外借比佢地既後防小將湯姆利亦將完成收購事宜,正式遠赴意大利離開史丹福橋。

車路士官方宣佈與基奧特續約一年後,普偏球迷都對於哩單消息感到正面,雖然未知是否意味住球會並未能收購新中鋒,變相需要留低法國人同夏維斯以及添姆雲拿輪換,但隨即傳出消息指球會早已於四月已經決定單方面啟動續約條款,同時與基奧特既經離人達成君子協定,如果有其他聯賽球會出價的話藍軍會願意放人,亦即表示車路士並非有意留人,而都只係希望喺交易中收返轉會費。

雖然未知當中消息真偽,不過相信一切都有待於歐國盃過後自有定案,早於前季沙利執教年代時都早已傳出哩位法國中鋒希望離隊他投,當中主因主要因為希望有足夠既上陣時間確保佢能夠入選國家隊出席職業生涯最後一次歐國盃,無奈地受到武肺影響之下盃賽延期一年,基奧特亦選擇留低於史丹福橋之中,今日藍軍經已成為歐聯冠軍,佢亦一嘗大耳朵盃既滋味,球會下個目標定必放喺英超奬盃之上,而同時佢亦順利入選國家隊歐國盃名單之中,究竟會唔會回心轉意選擇留效多一段時間,還是繼續確保到上陣機會為先,將會好快揭盅。


文章發表時間 : 14/06/2021 13:00
文章最後更新時間 : 14/06/2021 13:00
《原創文章 歡迎轉載 請列明出處 謝謝》
Bluexlion車迷手記 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

標籤: 車路士  基奧特  堤亞高施華  杜曹  

留言


請按此登錄後留言。未成為會員? 立即註冊
    快捷鍵:←
    快捷鍵:→