《老將清泉 球壇瑰寶 - 卡巴尼路》

BluexLion車迷手記 於 28/02/2019 發表 收藏文章
《原創文章 歡迎轉載 請列明出處 謝謝》
-請支持藍獅 Facebook專頁-

.圖片來源 : PressFrom

相信近日最為人討論得多都非基柏 (Kepa) 事件莫屬,但反而可以話身為「受害者」嘅卡巴尼路喺事件中嘅表態依舊正面,亦無向外界講多一句壞說話,可以話防止咗傳媒大造文章嘅機會,雖然哩單野可以話名留青史,但卡巴尼路嘅職業態度對依加好多新一輩嘅年輕球員嚟講係好值得學習。

三十有七,可以話職業生涯都到尾聲,論實力,佢對比於保方果啲當然唔係一級門將,不過論態度,卡巴尼路可以話積極正面,從來都唔介意擔任後備,無論當時喺曼城嘅時候正選係祖赫特定巴禾,以至去到車路士之後係古圖爾斯定基柏,卡巴尼路都一直安份守己,只要球隊需要佢,教練要佢上場時,卡巴尼路都一定交足貨,唔會因為少出場機會而喺實力上有明顯下降,同時亦都好願意教導後輩。

列強總要有兩個出色嘅門將,即使正選門將因為受傷或者其他原因上唔到場嘅時候,後備門將都能夠為球隊填補番哩個位置,盡可能避免成績過度下滑,但由於好多時哩啲情況喺一個完整賽季都未必出現,導致後備門將可能連一場聯賽出場機會都無而離隊他投,就好似早幾季嘅比高域咁,最終選擇離開加盟般尼茅夫擔任常任正選,所以好取決於後備門將嘅心態上究竟將自己定位於球隊中嘅咩位置。

正所謂「家有一老如有一寶」,喺一啲面對傳媒同穩定球隊方面,老將喺處理哩啲問題上就絕對係「老煉級」,避免外界炒作穩定軍心,亦好維護後輩。而今場可以算話大戰嘅倫敦打吡被沙利安排以正選上場,卡巴尼路嘅表現亦非常稱職,更能夠以不失球姿態完成賽事,賽後亦表示基柏喺背後十分支持佢作出選,可以話比到哩位後輩一個落台階,希望基柏能夠經一事長一智,嚟緊繼續好好向卡巴叔學習。

無論如何,擁有卡巴尼路哩種後備門將對車路士嚟講絕對係一種福氣。


文章最後更新時間 : 28/02/2019 15:30


《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/


留言


請按此登錄後留言。未成為會員? 立即註冊
    快捷鍵:←
    快捷鍵:→