《「美國隊長」的悲歌 普利錫在英超的自我求贖》

藍獅 於 15/10/2019 發表 收藏文章
《原創文章 歡迎轉載 請列明出處 謝謝》
-請支持藍獅 Facebook專頁-


車路士青春風暴來臨,不過有一位同樣相當年青既球員依然尚未得到太多機會去表現自己,講緊既就係上季由德甲多蒙特所收購返黎既「美國隊長」普利錫,由九月開季至今得到既上陣時間少之又少,究竟係球員身體上仲未準備好踢英超?還是林伯特既戰術藍圖並未有其可用範圍?一齊研究一下...

普利錫出生自一個克羅地亞家庭,父親曾經係一名美國室內足球員,2015年初正式加入多蒙特青訓梯隊,由U17再慢慢晉升至U19,再正式到一隊上陣,普利錫喺德甲表現出自己係一名相當具天份既翼鋒球員,踢法細膩,善於盤帶以及高速過人,雖然年紀輕輕但毫不怯場,展現出可造之材既前境。可惜自另一名小將辛祖登陸德甲過後,由於哩位英格蘭新星冒起速度實在相當驚人,普利錫亦只好被列後備,而正係哩個時候車路士就選擇出手將佢收歸旗下。

當時曾經一度傳出收購普利錫係為左夏薩特既離開而鋪路,亦有指係藍軍高層其實一早經已知道自己會受轉會禁令所限制,所以早早出手買定先,5800萬鎊對於一名岩岩20出頭既年輕人黎講當然係一單相當具風險既收購,但車路士明顯買好球員未來既前境,哩方面未知數亦實在難以量化,同時讓「美國隊長」以外借身份繼續效力多蒙特,直到今季先至正式登陸史丹福橋。

喺季前熱身賽其實林伯特都有比唔少時間普利錫上陣,技術上的確有啲夏薩特既影子,但要去到比利時人既高度,說實話依加睇落暫時都唔會去到住,自英超開咧後普利錫都有喺頭四場聯賽上陣,不過望落佢喺一啲背身持球方面顯得相當吃力,明明另一小將蒙特同佢身形上都差唔多,但人地背身「得」住個位拎到波之餘仲可以自己同隊友撞牆或者走一段,反而普利錫好多時一下就比對手boom走,連個波都未攞定仲講乜野做其他野。

雖然岩岩喺上一場對修咸頓果場交都一下相當穿透性既「毒」波助攻巴舒亞伊射入,不過如果普利錫真係有心想爭番個正選位返黎踢的話,強化背身能力必定係首樣要解決既項目,否則就算你幾好波都好,面對住身型上比你優勝得很同時踢法硬朗既對手時,如果你繼續掌握唔到個中技巧,基本上係唔可能「有肉食」。


文章發表時間 : 15/10/2019 13:35
文章最後更新時間 : 15/10/2019 13:35

《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

標籤: 車路士  普利錫  林伯特  多蒙特  

留言

會員
我要評論
請按此登錄後留言。未成為會員? 立即註冊
  • Stevengngng
    Stevengngng 於 15/10/2019 評論 NO. 1

    普利錫出生自一個克羅地亞家庭,父親曾經係一名美國室內足球員,2015年初正式加入多蒙特青訓梯隊,由U17再慢慢晉升至U19,再正式到一隊上陣。 到底你講緊老豆定仔

  • Jason514
    Jason514 於 15/10/2019 評論 NO. 2

    佢可以參考下大衞施華依十年黎點樣係英超立足(唔係靠身位

快捷鍵:←
快捷鍵:→