《終止連勝氣勢 修咸頓對車路士賽後分析》

藍獅 於 20/02/2021 發表 收藏文章
《原創文章 歡迎轉載 請列明出處 謝謝》
-請支持Bluexlion車迷手記 Facebook專頁-


當強勢遇上弱勢,結果換來雙方各執一分,車路士自杜曹上任後一直維持連勝,相反對手修咸頓近斯走勢相當不穩連場失分,今場和局難免又令人想起藍軍過去總會幫助弱勢對手谷底反彈之嫌,不過說實話今場波車路士的確明顯出現好幾個打得唔好既地方,執得一分亦可以叫做得安慰奬。

賽程頻密,加上下週中歐聯戰線重燃將要作客馬體會,杜曹今場波作出好幾個主力換人調動,雖然夏弗斯同堤亞高施華復出重新參與操練,不過今場波依然並無在席,門場由文迪重新復任正選,並安排左蘇馬接替上場頂替施華作正選既基斯甸臣擔任中堅置中既位置,亦係球員本人自杜曹上任後第一場聯賽正選上陣,身旁兩名拍檔就依舊保存魯迪加以及隊長艾斯派古達,而中場方面亦先收起左佐真奴,由簡迪配合高華錫作雙中場,至於左右翼衛方面亦繼續保留馬高斯阿朗素連同列斯占士作正選,前場就派出上場受傷既艾巴咸搭檔添姆雲拿以及蒙特作攻堅。

今場波亦係首次正選拆散左高華錫同佐真奴哩對聯賽正選中場組合,哩對組合可以話主宰左藍軍整套戰術既核心場位,由後場組織、減壓再去到轉換為進攻既過程,亦明顯睇到今場波換上左簡迪之後球隊缺乏左進攻既方向性,當然並唔係話簡迪經已一無是處,佢係掃蕩同防守上依然保持稱職,只係喺哩一刻在於以球隊戰術為前題下佢仲需要時間適應同融合,相信哩一點球迷係理解的。

喺缺少左佐真奴在場之下,亦同時加大左對蒙特既負擔,變相令球隊更需要佢去創造進攻機會,上半場其實車路士一直掌握住場面同節奏,亦都只係一下既犯錯同疏忽被對手領先,蘇馬既一下失位鑄成大錯,不過亦要怪球隊喺掌握形勢下一直都無法成功製造入球,而去到下半場換入奧岱後的確能夠激活到右路既發展,亦明顯喺更衣室出到黎既初段時間球隊喺運動推進既速度方面都係有所提升,亦引致到博得十二碼追平既機會出現。

可惜既係之後既時間都無以為繼,修咸頓亦開始加強防守收窄空間,杜曹相繼換入薛耶治及佐真奴亦無力回天,而較值得關注既係奧岱喺半場換入後亦喺約半個後被換出,賽後杜曹解釋不滿球員對比賽既態度,單以球迷睇既角度當然並無反映出前者所提出既論點,只睇到奧岱的確能夠為球隊喺邊路上注入左動力,而接替佢既薛耶治基本上可以話連觸球既時間都唔知有冇十次,相信哩個話題會成為記者們針對既重點,只希望唔會太過影響到教練同球員兩者之間既關係。

老實講今場波球員喺提速方面比起早幾場波係有明顯落差,加上正選名單上收起左部份主力安排輪換,喺戰術執行力上的確有所折扣,相信杜曹本人亦需要熟習一下英倫賽事既風格,面對密集時都可能都要嘗試一下簡單啲利用高波斬入禁區頂既哩啲招數,務求喺最後階段博得最大效益。

希望球隊能夠及時調整,做好準備迎戰喺下週中作客面對住馬體會既歐聯淘汰賽賽事。


文章發表時間 : 20/02/2021 23:45
文章最後更新時間 : 20/02/2021 23:45

《原創文章 歡迎轉載 請列明出處 謝謝》
Bluexlion車迷手記 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

標籤: 車路士  修咸頓  杜曹  

留言


請按此登錄後留言。未成為會員? 立即註冊
    快捷鍵:←
    快捷鍵:→