究竟搞邊科? 車路士2017年一共放走8人 但至今收購紀錄竟然仲係....

藍獅 於 03/06/2017 發表 收藏文章
-請支持藍獅 Facebook專頁-
<歡迎轉載 請列明出處 謝謝>

轉會窗尚未正式展開,但各大球隊經已密鑼緊鼓開始為下季做準備,紛紛傳出收購消息。而曼城在確認一批球員不獲續後,隨即官方確認落實兩個轟動既轉會收購,傳聞黎緊仲會陸續有黎。反觀車路士在下季回歸歐聯多一重戰線底下,近日官方既轉會消息都係不斷放走球員,就連一個正式收購都無,有出無入,究竟今次車路士係咩玩法?唔係又諗住玩最拿手既死線交易呀嘛?
.圖片來源 : Metrouk

踏入2017年,車路士至今一共放走8名球員,先有奧斯卡高價加盟中超上海上港,多年後備功臣米基爾同隨腳步加盟天津泰達,而副隊長伊雲奴域亦獲車路士首肯提早結束合約加盟俄超勁旅辛尼特,及後當時仲係護級份子米杜士堡宣佈正式收購借將班福特,意甲班霸在晉身歐聯決賽前亦啟動合約條款買斷古亞達度,而升班馬紐卡素在奪得來季英超升班資格後隨即收購借將艾素,直到近日年輕小將蘇蘭基及二號門將比高域各自在官方媒體確認下轉投至利物浦及般尼茅夫。以上賣走既球員加加埋埋一共為車路士帶黎多於八千萬鎊既轉會收益,哩個數字並非一個細數目,絕對有力收購兩至三名有實力相當既新球員。

<皇馬 / 莫拉達 - Morata>
.圖片來源 : itsroundanditswhite

正所謂「三軍未動 糧草先行」,相信干地亦深明這道理,在季前熱身賽前完成收購好讓新球員能夠預先適應戰術及與其他球員磨合,同時佢喺足總盃決賽賽後記者會指明車路士今夏轉會窗既收購必需重質亦重量,可見得干地完全明白藍軍以往收購既弊病。向來收購重任都係交由總監艾文拿路負責,此人過往既工作記錄絕對係壞收購比好收購為多,有傳干地羅致新前鋒上與艾文拿路針鋒相對,前者希望收購莫拉達但後者較想盧卡古回歸藍軍。講開又講,依加莫拉達同AC米蘭既轉會傳聞好似仲比車路士多,似乎在歐聯決賽過後球員就會有所決定;而盧卡古經理人指出球員會與愛華頓續約,雖然似係抬價居多,但如果最終車路士都不能成功收購兩者其一,相信要再喺市場上搵合適前鋒既難度只會有增無減。

除此之外,亦有唔少本身傳開既轉會目標都比其它球會撬走,例如阿特蘭大中場卡斯,同樣係比AC米蘭奪得心頭好,但明明之前傳去車路士既消息較多;法甲冠軍摩納哥中場巴卡約高又在曼聯與車路士之間舉旗不定,同時球會雙方之間在轉會費上亦在拉鋸當中;同為摩納哥既左閘文迪亦被曼城捷足先登;羅馬中場尼恩高蘭多番拒絕干地既招手離開首都狼;效力修咸頓既後衛雲迪克同樣要與多間英超列強爭番一段時間;收購拿波哩中堅高列巴尼亦好似不了了之。似乎車路士已經失去左多個頭號目標既轉會主導權。

<阿特蘭大 / 卡斯 - Franck Kessie>
.圖片來源 : tinthethao

<摩納哥 / 巴卡約高 - Tiemoué Bakayoko>
.圖片來源 : reddevilarmada
<摩納哥 / 文迪 - Benjamin Mendy>
.圖片來源 : fw-wordpress

<羅馬 / 尼恩高蘭 - Radja Nainggolan>
.圖片來源 : Chelsea-news

<修咸頓 / 雲迪克 - Van Dijk>
.圖片來源 : Cup.com

<高列巴尼 - Kalidou Koulibaly>
.圖片來源 : Chelseaseason

唔單止收購上進展唔理想,各個英超冠軍成員更被其它豪門球隊視為招攬目標,好似艾斯派古達比巴塞同皇馬睇中、上一任領隊摩連奴就想帶馬迪同韋利安到奧脫福、舊主馬賽就想巴舒亞伊回歸法甲等等。相信繼續會有球員離開藍橋,就好似一啲定位上模糊既球員例如堅尼地等。同時車路士仲有一班數量唔少既外借兵,當中究竟有多少人係岩干地來季拎番黎用仲係未知知數,而現階段藍軍必需在前、中、後及龍門位置上至少各補充一人,至可以有力於下季四線作戰下競爭。

收購消息零零碎碎,雖然現在時間尚早,但希望干地在休息過後就要迫使艾文拿路交代收購情況,免得同過往一樣一直只係同賣家在轉會費上拉鋸,喺沒有後備方案下比人襟住搶,最終只能於轉會死線前草草了事,買左一啲完全唔岩用既球員番黎。如果唔係就只會重蹈覆轍,干地會與歷任領隊落得同樣下場。

轉會窗 絕對係一場球會與球會之間既時間競賽...

<歡迎轉載 請列明出處 謝謝>
藍獅 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

標籤: 車路士  干地  

留言

會員
我要評論
請按此登錄後留言。未成為會員? 立即註冊
  • OhMyGirl_Arin
    OhMyGirl_Arin 於 03/06/2017 評論 NO. 1

    kessie去左米蘭啦...

  • KenChan沙田友
    KenChan沙田友 於 03/06/2017 評論 NO. 2

    車仔真係被傳媒賣光:
    哥斯達〉中超球會丶馬體會
    法比〉AC米蘭
    夏薩特丶古圖斯丶阿朗素丶簡迪〉皇馬
    摩西斯丶AZP〉巴塞
    韋利安丶馬迪〉曼聯
    韋利安〉拜仁
    巴舒亞伊〉法甲球會丶喜鵲(找卡數)
    蘇馬〉法甲球會丶羅馬丶國米
    Ake〉櫻桃軍

快捷鍵:←
快捷鍵:→