《祖奧菲歷斯 與 車路士 發生了什麼事?》

BluexLion車迷手記 於 12/01/2023 發表 收藏文章
《原創文章 歡迎轉載 請列明出處 謝謝》
-請支持Bluexlion車迷手記 Facebook專頁-


點睇菲歷斯哩單deal?其實就真係好睇你點睇...

如果從球員角度出發,喺施蒙尼體系下既發展都已經到達頂點,明顯無辦法可以再進一步之下尋求離隊可以話唯一出路,但係一直無下家能夠負擔得起馬體會所標出高昂既轉會價格,而唯一選擇亦都只能夠外借加盟,無論打得好還是打得差都總叫做尋求過改變既機會,哩一點都係理解。

而由馬體會角度睇,當年以過億轉會費將菲歷斯由賓菲加帶到黎西班牙,即使哩一刻唔啱用要賣走佢都唔能夠話蝕咁多,就連租借費都一定係貴,起碼蝕少啲,而傳言施蒙尼已向球會提出請辭季尾離開,換句話說菲歷斯如果外借半季返到黎就有機會重新開始,外借前再續埋個新約到2027年,就算外借打得好都確保到有高價先放行,至少保得當年買入價條數。


再到保利既角度睇,佢未必會知菲歷斯既能力去到邊,最多係知佢係一個名氣唔細而喺岩岩世界盃代表葡萄牙有唔錯表現既球員,但保利背後打緊既算盤就絕對唔止係菲歷斯一個,而係佢既經理人姐係文迪斯既主意,自成為車路士班主後佢一直都有同唔少名牌經理人打交道,生意人離不開都係透過哩啲方式過往,同時文迪斯亦都好需要透過佢旗下球員既轉會去獲取利益,而今個轉會窗就輪到菲歷斯,順帶一提文迪斯亦係安素費南迪斯(Enzo Fernández)既經理人,究竟係咪喺哩單交易失敗後至臨時推薦菲歷斯比保利就不得而知,但今次哩11M租借費都只係見面禮,未來二人都一定會更多生意上既往來。


最後由樸達同球隊戰術角度出發,老實說菲歷斯絕對係一個質素唔差既球員,但同時佢係一個相當難用得好既球員,好睇身邊既隊友組合同分工係點至可以發揮得出自身優勢,但車路士依刻既處境其實都相當混亂,樸達明顯對於大部份球員既運用都未係好清晰,夏維斯都經已愈踢愈沉,再加上球隊傷兵潮既影響,哩個時候再加多個菲歷斯入黎難免會令人有亂上加亂既感覺。

個人覺得球會亂石投藥就一定,轉會窗黎到一半先黎借入佢點睇都唔似係一早安排,球會選擇哩一刻至出手好大機會係因為史達寧同佩利錫都同時受傷,而安素既交易亦都告終後文迪斯亦急需要有替補球員推薦比保利,既然C朗黎唔成咪整個菲歷斯比你食左佢。

不過最後都係果句,簽咩都係假,再唔簽新中場就唔洗止意上番上游。


文章發表時間 : 12/1/2023 17:15
文章最後更新時間 : 12/1/2023 17:15

《原創文章 歡迎轉載 請列明出處 謝謝》
Bluexlion車迷手記 每週出文 用心寫每篇文章 給我們一個Like作支持 : https://www.facebook.com/bluexlion/
標籤: 車路士  祖奧菲歷斯  馬體會  

留言


請按此登錄後留言。未成為會員? 立即註冊
    快捷鍵:←
    快捷鍵:→