《為何林伯特需要一個薛耶治?(上)》

藍獅 於 10/05/2020 發表 收藏文章
《原創文章 歡迎轉載 請列明出處 謝謝》
-請支持藍獅 Facebook專頁-


早喺年頭冬季轉會窗結束之時,車路士官方正式宣佈簽下阿積士翼鋒薛耶治(Hakim Ziyech),哩單deal可以話令唔止藍軍球迷驚訝,更被受外界所注視,主要原因係喺車路士被提早解禁轉會窗時一整個月都風平浪靜未有任何動作,進不知一個屈尾十喺結束無耐就以3700萬鎊簽下哩位近年受歐洲球壇所熱烘既翼鋒球員,林伯特究竟睇中左薛耶治啲咩?將會分上下兩集探討...

據報車路士三年前已經一直有觀察哩位摩洛哥國腳動向,上季阿積士先後喺歐聯淘汰皇馬以及祖雲達斯時,薛耶治既亮眼表現經已獲得唔少球會有所留意,不過最後就只有西甲既西維爾作出正式報價,而球員以阿積士與西維爾喺同一水平為由拒絕左有關轉會,亦意味住只有列強球會至可以吸引到薛耶治離開成名之地,而其後阿積士亦提供一份新合約比佢,喺合約期不變既情況下提升左週薪以及刪除當中既最低解約金條款,可見哩支荷甲班霸都認為薛耶治有離開既可能。

而車路士喺今季中段正式出手求購,好大原因係關乎到上半季車路士與阿積士喺歐聯賽場交手時薛耶治既個人表現,哩位摩洛哥翼鋒都帶到比唔少車路士球迷一個相當深刻既印象喺度,亦差啲將藍軍由歐聯拉到歐霸戰線當中,雖然最終阿積士需要轉戰歐霸盃,不過佢地既整體成績實在令人難忘,而喺場邊觀察既林伯特定必感受最深,尤其係薛耶治以一人之力衝擊己方防線,反觀自己陣中無論喺翼鋒還是攻中位置卻欠缺特質類近以及能夠達到同樣戰術水平既球員喺度。

自夏薩特離隊後,雖然林伯特刻意提升一眾年青小將到一隊打大「青春足球」,而喺韋利安等老將帶領下小將們亦交出百二分努力嘗試維持高水平輸出,但如果要將球隊整體實力再進一步的話,局部位置上亦需要收購新球員而將質量提升,尤其係喺進攻乏力方面,球隊喺面對較著重防守既對手時更顯得老鼠拉龜,隊中實在欠缺一名能夠以一己之力為隊友開闢多元進攻路線既球員喺度。

再加上韋利安同柏度都未有喺續約方面有任何進展,前者企硬三年約後與球會雙方一直僵持不下,而後者就等待武漢肺炎疫情舒緩過後再同藍軍商討續約事宜,而同車路士一直有轉會傳聞例如水晶宮翼鋒韋費特沙夏(Wilfried Zaha)同多蒙特既辛祖(Sancho)等,都喺功能上同價錢上未必適合依加既車路士,而舊將保加(Jeremy Boga)亦相信作回購轉售居多,反而薛耶治既性價比上就比較乎合藍軍依加既條件類型。

下回將集中討論薛耶治既個人特質以及戰術效益點樣幫助到依加既車路士提升到另一層次,以及球員喺由荷甲轉戰到英超賽場時所面對既困難以及其風險...


文章發表時間 : 08/05/2019 11:55
文章最後更新時間 : 08/05/2019 11:55

《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

標籤: 車路士  阿積士  薛耶治  林伯特  

留言


請按此登錄後留言。未成為會員? 立即註冊
    快捷鍵:←
    快捷鍵:→