《清風送爽的谷底反彈 水晶宮對車路士賽後分析》

藍獅 於 11/04/2021 發表 收藏文章
《原創文章 歡迎轉載 請列明出處 謝謝》
-請支持Bluexlion車迷手記 Facebook專頁-


歐戰波圖過後,馬上要作客迎戰另一支倫敦球會水晶宮,雖然美中不足地出球一個失波未能力保清白之身,不過仍可算係清風送爽地取得一場大勝,而擔任正箭頭既夏弗斯更交出一入球一助攻,連同佩利錫兩個入球以及蘇馬一個頭槌入波以四比一擊敗水晶宮,可以話喺大敗比西布朗後球隊用表現作出最好既回應。

堤亞高施華停賽,加上基斯甸臣受傷,杜曹亦作出個別位置輪換,喺未有後備中堅人選底下安排蘇馬伙拍魯迪加以及艾斯派古達為三中堅正選,右翼衛收起左列斯占士換上近兩場波都未有落場奧岱擔任,而左翼衛就繼續由上場歐戰取得入球既捷維爾打正選,至於雙中場方面繼續係佐真奴拍高華錫,前場維持夏弗斯以及蒙特,收起左添姆雲拿換上佩利錫。

車路士依舊以控球為重心,球員之間互動猜傳走位令水晶宮初段經已非常捱打,亦同時接連出現頭兩個入波,夏弗斯表現出功架令球隊取得領先優勢,一直都認為哩位德國新星最能發揮既地方係喺禁區之內,而半場前亦有一球左腳挑高右腳射門既一氣呵成動作,如果唔係被對方龍門救出的話,相信絕對有力一爭年度入球奬項,而下半場亦出現兩個黃金入球機會,不過都略欠角度被救出,錯失連中三元既機會。

而球隊無論喺失控球權之下還是由守為攻之間既轉換都做得非常流暢,喺對手控球之下立即在前場組成包圍網,球員之間既企位相當具組織性,令水晶宮唔能夠輕宜製造出進攻空間,更成功凍結左佢地既金牌射手沙夏,至於死球部署方面球隊喺今季亦得到明顯提升,無論喺死球或角球方面多次製造到攻門畫面,而蘇馬絕頂既騰空能力亦成功為佢收獲到一個入球。

下半場杜曹亦相應換入簡迪加強掃蕩鞏固球隊防守,同時安排部份核心球員相繼休息,而佩利錫亦喺傷癒後用兩個入球作出最大回應,美國隊長既表現同質素一直都無乜太大質疑,尤其喺前插入禁區既提速同埋門方面更可以話係陣中最頂級既一位,只係佢既體質實在太容易受傷,而球員博盡唔錫身既心態亦令球迷喺見到佢多下飛剷畫面出現後表現擔心,亦推斷出杜曹喺比賽末段八十二分鐘至換入薛耶治,唔多唔少都可能因為保留換人機會以防佩利錫受傷。

一場清風送爽既大勝無疑增強左球隊既信心,去迎戰黎緊歐聯次回合以及足總盃準決賽對曼城既賽事,老實講早次對西布朗既大敗可能會係一次唔錯既警號經歷,驅使全隊得知心態上出現鬆懈,亦用兩場勝仗去作出回應,黎緊大戰連場希望球隊亦能夠成功保持到哩種狀態落去。


文章發表時間 : 11/04/2021 12:25
文章最後更新時間 : 11/04/2021 12:25

《原創文章 歡迎轉載 請列明出處 謝謝》
Bluexlion車迷手記 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

標籤: 車路士  水晶宮  杜曹  

留言


請按此登錄後留言。未成為會員? 立即註冊
    快捷鍵:←
    快捷鍵:→