《沙利在倫敦的第一個冬天》

藍獅 於 10/01/2019 發表 收藏文章
-請支持藍獅 Facebook專頁-
《原創文章 歡迎轉載 請列明出處 謝謝》

.圖片來源 : SundulGol

踏入2019年,亦意味著英超經已踏上一半旅途,相對於上季曼城喺聖誕快車經已遙遙領先,今季前列球隊排名就緊湊得多,利物浦同曼城正為爭冠鬥得你死我活,緊隨其後就有熱刺,而車路士以及阿仙奴就真係難兄難弟排第四五位,至於換帥後既曼聯亦開始追貼。講番車路士,今季沙利接掌帥印後成績並沒有干地所帶既第一季亮眼,當然,形勢上亦與當年不同,各支球隊既陣容同打法亦有唔少進步,但意大利人喺打法上既單調似乎亦令唔少球迷不滿,今集半程總結會為大家討論一下。

沙利上任後並沒有為干地所種下既三後衛留下任何行跡,收購舊部佐真奴為433陣式戰術核心,同時向皇馬借用高華錫一季,先講哩兩單收購,有留意開藍軍既球迷都知道,其實車路士既中場人手只有量沒有質,除左簡迪之外,法比加斯經已不復當年勇,巴克利、真禾特被投閒置散,而巴卡約高亦被配上「水貨」之名,質素上絕對需要提升,佐真奴其實唔需要多講,有沙利就一定要有埋佐真奴先搞得掂,至於借到高華錫就真係一非常好既轉會操作,能力經已比起其他球員高一班,如果能夠喺體力同對抗性上再提高,就真係接近完美無瑕,當然前題仲要睇佢下季能唔能夠留隊啦。

同時間喺沙利手上有好幾個球員都得到重生或者唔少機會上,最大得益者一定非巴克利莫屬,繼而就係路夫斯捷克、奧岱等年青球員。喺戰術方面,沙利較著重於速度同球員互相走位製造機會,同時亦希望中場球員喺適當時間前插及壓上,潛伏於禁區頂位置,不過經歷左半季時間,球隊喺進攻同防守依然存在唔少明顯問題需要沙利解決。

<<防守位置形同虛設>>
由於著重前壓,引致好多少一比人打反擊時後防就出現中空情況,其實哩個問題都好關乎到後防球員能力有關,只係過往兩季都有簡迪幫手喺中後場執漏,但沙利今季並沒有將法國人放回熟悉既防中位,反而將佢改造成較多從後前插入禁區既進攻手,而靠後既佐真奴亦不善於保護防線,令車路士防守問題再次出現,單靠魯迪加、沙巴拿加等年輕少將亦難力保不失。

<<左閘問題再被放大>>
其實上季都有講馬高斯阿朗素既頂點已經到,哩個年紀好難再喺速度上有提升空間,喺有三後衛既保護下西班牙人回防慢既問題亦導致球隊失左唔少波,更何況依加打既係433,更著重於閘位球員壓上後需要極速回防,艾馬臣其實非常適合於依加既打法,但沙利並無將佢放喺聯賽既輪換名單上,同時表示馬高斯阿朗素喺處理死球同防守死球上更佳,哩點唔少球迷都「黑人問號」左。

<<久攻不下 變化單調>>
進攻乏力好多人都歸咎於莫拉達,話佢把握唔到應入則入既機會,但其實都只係其中一部份,球員喺進攻配合上既問題先係重點,韋利安同夏薩特都偏好於自己埋中間嘗試取後入球機會既球員,引致中路囤兵太多,對手較易利用人數去完堆砌防守,即使中場或閘位球員壓上拉邊,亦只做博腳居多,加上欠缺遠射能力,面對對手密集防守時缺少遠射既命中實在十分輸洩,同時陣中亦只有夏薩特及柏度較善於持球突破,進攻變化單調欠缺變化,而新收購既普利錫亦要夏季至正式加盟,遠水不能救近火。

結語
始終今季球隊係以前四作為目標,陣容上亦難以與利物浦及曼城兩隊作比,而車路士開季至今喺一啲強強對決時都交出好表現,反而對住中下游時為人詬病地失分,的確帶住一點「海鮮」既味道,如果季後最終亦前四不保,連續兩年缺少歐聯資格之下相信隊中所引發的問題就只會更多,情況實在不堪設想。

其實仲有唔少瑣碎問題,有機會再同大家續一分享...

文章最後更新時間 : 10/1/2019 17:00

《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

標籤: 車路士  沙利  

fanpiece 推薦

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→