《沒有中場的三後衛陣式 里爾對車路士賽後分析》

藍獅 於 05/10/2019 發表 收藏文章
《原創文章 歡迎轉載 請列明出處 謝謝》
-請支持藍獅 Facebook專頁-


其實真心都真係幾悶下,捱夜喺凌晨三點起到身睇既朋友真心佩服。遠赴法國作客,林伯特以求穩作賽,利用三後衛陣式應戰,前場由艾巴咸、韋利安、蒙特作攻堅,中場簡迪復出搭佐真奴,後場左中右中堅分別係湯姆利、蘇馬同艾斯派古達,而左右翼衛就係馬高斯阿朗素同占士。
.
先講哩個正選名單,其實個人應為哩個人選幾大膽,大膽在右翼衛用占士,球員對上一次打出選都係講緊早一星期喺聯賽盃亮相,英超都未打已經上黎打歐聯正選,之後會再講。講返場波,好多時都係利用中堅挖個波上去或者翼衛運個波上去,完全可以話唔經中場,所以今場波會見到佐真奴無乜表現,就係因為好多波都唔經佢去,得完半場前有下靚遠射中柱,而簡迪復出後亦利用跑動同幫波製造左唔少鏡頭。
.
林伯特今場波好注重兩邊斬,將個波不斷左右運送希望拉開空位,不過由於對手過份壓縮於後半場,所以得出效果唔太明顯。講番前場,艾巴咸喺好幾方面都針對到對手,無論喺身形定係技術上都係,而前場三個會互相換位,或者左右兩邊互換,又或者兩隻翼都企埋同一邊。雖然最後一點會比較少,不過咁既自由度能夠令對手更加難以防守,個人覺得係正面既。而韋利安就真係痴哂線咁,繼上場瘋狂追波之後今場亦同樣地走黎走去,人地由右後場推到去左前場都依然瘋狂追住,哩樣野全隊得佢同簡迪做到。而蒙特明顯今場波都幾攰下,尤其到左下半場更什,個人認為係時候唔好比佢做正選住要抖一抖。
.
至於後場方面,感覺蘇馬今場波喺上搶方面無湯姆利咁乾淨,雖然後者都有一個比較致命既失誤,不過蘇馬果下漏頂就令對手成功追和,其實都講過N次佢哩個老問題,亦顯生出林伯特喺區域聯防方面既陰霾。開季至今都有唔少失波或者驚險畫面係喺防守角球或者死球既時候出現,就係因為後場球員係利用區域聯防既方式去作怖防,而唔係人釘人man mark咁去針對對手,令到球員好多時都只會睇波而唔係睇人,而對手亦能成功透過球員與球員之間既盲眼位製造機會,我地既後防球員實在太嫰,經驗不足再加上無老大哥在場提點的話做區域聯防真係好易出事。
.
而翼衛方面,左邊既阿朗素都無乜大補充,反而右邊既占士就真係好一般,個人黎講唔會責怪佢,不過以一個久病傷癒再只係踢過一次波既年青球員黎講,咁快打歐聯既風險好高。亦相信球員知道自己今場波踢得唔好,心理上絕對會構成壓力,理應先循序漸進喺聯賽上吸收上陣時間,等球員適應到比賽節奏同球隊戰術後 ,建立一定信心後先再為球隊喺歐聯賽事中上陣會較為合適。
.
林伯特喺66分鐘換入奧岱後隨即轉陣打番433陣式,希望能夠打破悶局,雖然最終都能夠成功由韋利安射成1:2,不過今場波既中龍埋門機會並唔多。穩係夠穩但始終好難製造到機會,未知係咪關乎作客加上無太多輪換球員比較攰,而同時林伯特今場波既換人都真係比較慢,自換入奧岱之後既第二同第三個換人都要數到80幾分鐘,其實場上都睇到蒙特經已唔係好跑得旭,係咪可以比多啲時間柏度去分擔一下呢?加上後者今季上陣時間比較少,明顯狀態無以往咁fit,其實更加需要多啲上陣時間操好個態,再比到休息時間蒙特,如果唔係等到蒙特不幸受傷時先用未操好既柏度就麻煩了。
.
至於最後想講一講今場波連後備名單都唔見人既巴克利以及普利鍚,前者早一段時間被影到話醉酒後搭的士無比錢搞到要搵差佬,雖然林伯特事後有講話球員已經同佢道左歉再加上無比人告,希望平息事件,不過今場波明顯收起佢作罰。至於普利鍚,就真係要比心機適應下喇,始終德甲同英超既環境唔同,無論喺賽事節奏定其他因素方面,依加就連奧岱岩岩傷好都能夠後備上陣反而你就仲未ready,如果keep住正選果幾個都打得好而你喺盃賽都仲未搞得掂的話,都真係幾難挑戰到常任正選哩個位...


文章發表時間 : 5/10/2019 14:25
文章最後更新時間 : 5/10/2019 14:25

《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

標籤: 車路士  林伯特  里爾  歐聯  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→