《水兵鬥海軍之大亂鬥 車路士重掌前四主導權之迷思》

藍獅 於 25/04/2019 發表 收藏文章
《原創文章 歡迎轉載 請列明出處 謝謝》
-請支持藍獅 Facebook專頁-


好耐都無為車路士喺英超排名上出過文章,一黎無咩內容好打,二黎打黎打去講沙利既問題都講到口臭,所以索性專攻講下球員同青訓好過,不過黎到英超第三十五輪既賽事完結之後,令人意外既係車路士竟然重掌番前四既主導權,見唔少車迷因為咁而好高興,不過係咪真係咁易食?睇埋落去你就知咩叫絕望真相。

老實說,對於除左曼城同利物浦之外既其他列強,得罪講句真係好有「水兵鬥海軍」既感覺,大家都好似唔想要前四咁,不斷嘔番啲分數出黎,當然你可以話英超中下游唔係流,不過頻頻喺差唔多時間令到咁多支列強脫腳既場面就真係好少見,兩輪之前車路士其實都一早打定輸數,因為無論論積分、賽程同對手,藍軍都一直處於阿仙奴下風,當時都有話倒不如專心歐霸,聯賽就由佢彿系隨緣,誰不知槍手連續兩輪聯賽六分全失,主導權又再一次黎到車路士手上,哩兩支倫敦球會真係可以話夠哂「難兄難弟」。

熱刺經一輪調整後相信黎緊失分空間都唔大,即使有歐聯戰線要兼顧,但佢地睇落都似會咬緊牙關打埋道氣落去,咁聯賽第三位置都無得點走,至於第四位繼續由車路士、阿仙奴同曼聯哩三支球隊去爭,黎緊最決定性既就必定係黎緊紅魔主場對藍軍哩場波賽事,雖則曼聯近排士氣低迷,啱啱先喺奧脫福輸左比同市宿敵曼城,但咁就足以令車路士拎哂哩三分?相信對部份車迷黎講一定有啲保留。

主要原因都係因為今季車路士喺聯賽作客既成績實在慘不忍睹,面對列強既所有作客賽事全部輸哂,你無睇錯,係連和都無一分都拎唔到,仲要輸過比愛華頓、般尼茅夫,狼隊就更加唔洗講。咁既往績要喺奧脫福全身而退可以話難上加難,就算曼聯士氣再低都好,都唔見得藍軍近期狀態好好,先後賽和般尼同輸左比利物浦,黎緊哩場「紅藍大戰」,以車迷角度樂觀啲睇都只能夠抱著坐輸望和既心態去睇哩場波。

至於前四?食得架?


文章發表時間 : 25/4/2019 14:15
文章最後更新時間 : 25/4/2019 14:15

《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

標籤: 車路士  沙利  曼聯  阿仙奴  

留言


請按此登錄後留言。未成為會員? 立即註冊
    快捷鍵:←
    快捷鍵:→