《昔日藍軍翼衛或與干地在國米重聚》

BluexLion車迷手記 於 25/05/2019 發表 收藏文章
《原創文章 歡迎轉載 請列明出處 謝謝》
-請支持藍獅 Facebook專頁-


意甲帥位重新排位,而岩岩拎番車路士解約金既干地亦有傳相當接近接掌國際米蘭,相信只要靜待打埋最後一輪聯賽就會公佈有關消息,媒體亦開始推測意大利人會為藍黑軍團帶黎邊幾位新血,而傳得最接近既一位就係依加被車路士外借到土超費倫巴治既域陀摩西斯。

干地同摩西斯之間既結緣要數到16-17球季,前者首次登陸英超執掌藍軍帥印,而摩西斯亦結束韋斯咸既外借球季回到史丹福橋,兩人一同為新球季作季前操練準備,當時後者其實一直喺車路士都過著「被流放」既生涯,除左韋斯咸之外都先後外借過去比利物浦同史篤城,但喺各支球隊身上都拎唔到穩定嘅正選位置,所以每季完結後都會番去車路士參與季前操練無被買斷。

當時其實無人睇好摩西斯能夠喺干地手下取得一席位,是關喺翼鋒位置上有一個比起前者更有實力既球員,果個叫古亞達度,奈何哥倫比亞人既心理質素實在太差,加上唔習慣英國生活,而同時摩西斯喺季前集訓交出令人信服既表現,尼日利亞人速度高氣力好,加上勤力肯跑肯博命,硬爆過你就過你唔會做多餘野,令干地情願放行古亞達度返回意甲都選擇留番喺英超熟路嘅摩西斯,成功爭取留隊機會。

「中流質素打上流波」,最終摩西斯以右翼位既身份為車路士贏得應屆聯賽冠軍,初嘗捧盃滋味,干地可以話為摩西斯既職業生涯重新注入新力量一樣,亦令世界為右翼位哩個位置重新定位,所以依加干地希望再一次與摩西斯再續前緣其實都係有跡可尋,後者季初到費倫巴治既外借期其實為其十八個月,而球員為球隊爭取護級成功後近日亦開腔表示希望提早結束外借生涯,令人推測干地早已同佢聯絡。

如果最終真係成事,相信唔少車迷都會為此感到高興。


文章發表時間 : 25/5/2019 11:00
文章最後更新時間 : 25/5/2019 11:00

《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/

留言


請按此登錄後留言。未成為會員? 立即註冊
    快捷鍵:←
    快捷鍵:→