《明星效應吸引力大大提升? 探討林伯特的吸星魅力所在以及組軍方向》

藍獅 於 08/09/2020 發表 收藏文章
《原創文章 歡迎轉載 請列明出處 謝謝》
-請支持Bluexlion車迷手記 Facebook專頁-


新賽季即將開鑼,相反距離轉會窗正式完結就尚有時間,不過所有車路士球迷都已經經歷一個相當難忘既轉會窗,藍軍一口氣收購多達六名具份量既新球員,一改過往要先賣能買既「deadline fighter」作風,而且每單收購都係相當觸目而且有質素,究竟係時機上既配合還是林伯特既明星效應大大提升車路士既吸引力?一齊解構一下...

喺轉會窗開啟前,相信無一位車迷會估到球會會有哩個革命性既改變,喺早已落實薛耶治加盟底下,只期望球會會再喺中堅同左閘位置上作出補充,誰不知一下子再收購添姆雲拿、捷維爾、沙亞、堤亞高施華以至最近期公怖既夏弗斯,唔單至令球隊既即戰力提升,更重要既係大部份球員既年紀都相當年輕,基本上未來五年時間都無需為哩幾個位置擔心,但望番早一個轉會窗既時間,其實藍軍既轉會操作係令人相當不解。

受到轉會禁令影響下,車路士原先並不能喺上個賽季作出任何收購,官方亦就此作出上訴,最終成功將轉會禁令提前於冬季轉會窗結束,意味住球會其實能夠喺一月時進行新收購,加上球隊上半季既成績意外地能夠維持前列位置,如果再有新球員補充的話更能鞏固競爭地位,誰不知車路士喺整個一月並無作出任何相關操作,令到唔少球迷不滿指你又要打甩個轉會禁令,但同時比你打甩完之後又唔用黎買人,實在無人得知究竟係咩玩法。

而喺轉會窗結束無耐,球會就公怖與阿積士達成協議,薛耶治將於來季加盟,據報車路士球探一直有關注薛耶治至少三年時間,而喺阿積士挽留球員底下藍軍至決定喺轉會窗過後至正式提出收購,等佢可以喺荷蘭完成整個賽季過後至加盟,點知之後全球經歷武漢肺炎影響而停賽,各大球會喺收益上都受到史無前例打擊,財政上更加需要量入為出,擱置收購潛在目標既計劃,反觀車路士早被轉會禁限制,經已有一個球季無作出任何收購,喺資金充裕下所收購既目標基本上都喺無對手之下完成。

當然,除左配合左疫情哩個時機之外,林伯特喺過去一季既表現亦吸引到一眾年輕球員既目光同管理層既信任,「青春風暴」成功為球隊帶黎聯賽前四以及足總盃亞軍既頭銜,喺哩個燈光照射底下成功將車路士哩個品牌變革,由過去收購潛力新星將佢地租借出去然後再販賣既加工廠風格,變成今日小將們有晉身一隊既機會,大大提升整個球會既吸引力;再加上林伯特得到技術顧問施治以及財務總監Marina既配合,基本上佢所要求既大部份Plan A目標都得到後兩者支持,對比起早兩任主教練干地以至沙利同管理層既關係可以話有「天與地」既差距。

加上喺收購前林伯特都主動聯絡相關球員,希望對方得悉佢既未來計劃,可見得到除左單靠個人魅力外林伯特亦好願意用行動打動對方,再配合到時機以及管理層既支持,令今季整個轉會計劃更事半功倍,不過喺重金禮聘左咁多新球員底下意味住林伯特亦有需要交出相對既成績,相信黎緊面對既挑戰同壓力絕對唔野少。


文章發表時間 : 08/09/2019 11:35
文章最後更新時間 : 08/09/2019 11:35

《原創文章 歡迎轉載 請列明出處 謝謝》
Bluexlion車迷手記 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→