《文迪連環救世 運氣出手扶持︱賓福特對車路士賽後感》

藍獅 於 19/10/2021 發表 收藏文章
《原創文章 歡迎轉載 請列明出處 謝謝》
-請支持Bluexlion車迷手記 Facebook專頁-


有人會話,當場波係由守門員當選全場最佳,可想言之球隊既防線有幾咁脆弱,雖然對手只係今季既升班馬賓福特,不過睇番佢地由開季至今既戰績黎睇,能夠成功喺各列強身上搶到分數更為顯得藍軍奪得勝仗既珍貴,尤其喺賽事最後二十分鐘被對手連環強攻之下都能力保不失,當然亦有運氣既扶持。

國際賽週期過後,車路士大部份球員都需要代表所屬國家應戰,而後防大將堤亞高施華更加因為賽程原因導致今場波未能上陣,杜曹亦因此作出部份輪換,其中三中堅更換上三位非常任主力球員,分別係基斯甸臣、沙亞以及查路巴,當中沙亞更係首次為藍軍以英超正選身份上陣,而左右翼衛方面就將艾斯派古達由右中堅推上到右翼衛位,左翼衛就繼續由近日狀態有所回升再度被杜曹信賴既捷維爾擔任,至於三中場就有簡迪傷癒復出,配搭上場都係打正選既高華錫同路夫斯捷克,而前線就由盧卡古與添姆雲拿為雙前鋒組合。

如果將成場部分為兩部份,就可以直接將最尾二十分鐘同之前既時間完整割開,上半段既時間藍軍擁有絕大部份優勢,主導住球賽節奏製造唔少攻勢,尤其係左路既捷維爾相當活躍頻密地前插助攻,更延續上場英超同英格蘭國家隊既入球走勢以一記窩利為車路士先開紀錄,其實除左哩個入球之外,藍軍都有好幾下黃金機會可以拉開比數,可惜添姆雲拿同盧卡古都雙雙把握唔到,而其中後者既「蜜月期」似乎都已經完結,唔少同對方中堅一對一既身體對抗都輸左,暫時都未見到杜曹有任何跟進行動去幫助盧卡古發揮更大效益,哩一點都係值得關注。

延伸文章 : 《盧卡古與夏維斯不能同場? 探討車路士的進攻隱憂與問題所在》

當你唔能夠成功將比分拉開,變相就會為對手注入動力加強追平比數既希望,而場波就由七十分鐘開始逆轉形勢,局勢完全相反之下由賓福特變成主導,多次透過傳中或頭槌二傳製出相當驚險而且入肉既攻勢,即使杜曹喺之後既時間作出埋另外兩個換人調動之後球隊都依然喺受壓之下愈縮愈後,大腳解圍亦好快被對手立即將球運上前再圍攻過,最終經歷兩次門柱打救以及查路巴護空門,再加上文迪「鋼牆式神勇級」表現,成功為車路士避免左由小勝變為大敗既局面,就憑賓福特主帥湯瑪士法蘭克(Thomas Frank)既神情都經已得知佢地全失三分係幾咁不幸。

而橫觀成場波的話杜曹喺安排上有兩點係可以斟酌,首先係簡迪既位置,喺七十分鐘之前藍軍其實一直主導住控制權,但簡迪喺進攻層面上既輸出並唔多,係可以嘗試放手一博調入巴克利或者將路夫斯捷克推上前換入佐真奴從而為中前場增加多一個攻擊點,提升拉開比數既機會,亦變相可能可以避免左最後被對手圍攻既局面;而另外一點就係有關於調走盧卡古換入夏維斯哩個調動,雖則前者今場波既表現平平,不過佢既身體質素其實喺今場波既最後階段係非常重要,喺缺少左前場哩個硬度強點之下令到藍軍既攻擊線就只有雲拿提供到速度哩一樣破關元素,對手只要調動少量人手佈防再將其防線拉後就能輕鬆應付,力度實有所不足。

雖然最終都能成功喺作客「列強殺手」既情況下全取三分,不過睇到球隊無論喺攻守兩端都依然有唔少問題需要留待杜曹去解決,運氣係一種加持既元素,但整個賽季漫漫長路總唔能夠只靠運氣去完成。


文章發表時間 : 19/10/2021 10:30
文章最後更新時間 : 19/10/2021 10:30

《原創文章 歡迎轉載 請列明出處 謝謝》
Bluexlion車迷手記 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

標籤: 車路士  賓福特  英超  文迪  杜曹  

留言


請按此登錄後留言。未成為會員? 立即註冊
    快捷鍵:←
    快捷鍵:→