《捷維爾重傷提早收咧 誰能成為車路士左閘的過渡人選?》

藍獅 於 30/12/2021 發表 收藏文章
《原創文章 歡迎轉載 請列明出處 謝謝》
-請支持Bluexlion車迷手記 Facebook專頁-


早前受傷既捷維爾最終都決定開刀做手術,換句話說佢將會提早收咧無法參與賽季餘下賽事,亦同時意味住車路士喺左閘位置上就只係淨番馬高斯阿朗素一位主力擔任左閘既球員,適逢一月轉會窗即將開啟,藍軍可以喺哩段時間收購或借用其他球員去作補充,亦可以回收一啲外借左出去既球員返黎幫手,最終會如何操作?一齊分析一下。

先交待一下過去同依加球隊所面對緊既處境,季初其實馬高斯阿朗素係杜曹手中既正選左閘,直到中段捷維爾開始逐漸上力重奪正選位置,阿朗素既問題相信過去幾季都令大部份球迷知道,佢唔係無能力打正選,只係陣式上哩位西班牙球員只能夠擔任左翼衛,用得佢就預左係攻強於守要有左中堅喺身後幫佢包位,而依加既處境就係阿朗素唔能夠一個人支持到季尾,點都需要有其他球員幫佢分擔上陣時間,去應付餘下各項戰線既賽事。
沙奧尼古斯同奧岱都曾經兼任過左翼衛哩個角色,但效果並唔理想,而佩利錫同隊長艾斯派古達亦都較為啱打右翼衛居多,現有陣容並無一個合適既球員可以同阿朗素一齊擔任哩個位置,球隊需要一名新球員去過渡哩段時間,因為捷維爾總會傷癒重歸正選行列,如果哩一刻選擇重金再收購多一位常任左閘球員會令球隊處境相當尷尬,而車路士的確有兩位外借左出去既左閘球員可以回收,不過各自都有一啲因素令到哩個操作未必可行。

首先係今季外借到法甲里昂既艾馬臣,本身佢喺上季捷維爾加盟後都經已淪為第三左閘,什至要佢去打左翼,佢為左爭取上陣時間先選擇離開,而外借合約中包圍買斷條款,如果哩刻選擇回收自用的話意味住下季又要重新為佢尋找買家,哩個方案並不理想,至於另外一位就係外借到英冠高雲地利既年輕小將Ian Maatsen,但同樣地佢既能力同質素都未達乎英超標準,哩一刻繼續喺英冠吸收上陣經驗會較為合適。

而喺巿場上其實有幾位球員都可以考慮,包括愛華頓既迪尼、巴塞既達斯同阿積士既泰利亞費高,哩幾位候選人之中最合適既就必定係迪尼,首先佢經已同拖肥主帥賓尼迪斯反面,離開愛華頓係勢在必行,而同時球員亦需要更多上陣時間去爭取入選法國國家隊參與世界盃既機會,車路士必定可以提供到哩個環境比佢,至於特質上佢同阿朗素都一樣偏向攻大於守,不過迪尼勝在喺活力、速度同效率方面都會比前者優勝,哩幾點對於依加既車路士黎講係相當重要。

相信外借方案對於愛華頓黎講係可行的,而佢地亦有傳睇中左巴克利為轉會目標,但要留意既係車路士一直都同拖肥無乜計傾,自從當年收購史東斯失敗後就只有巴克利一單交易,今次能否促成轉會就要睇兩間球會點操作,還是車路士會有其他方案去實行。


文章發表時間 : 30/12/2021 13:00
文章最後更新時間 : 30/12/2021 13:00

《原創文章 歡迎轉載 請列明出處 謝謝》
Bluexlion車迷手記 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→