《打破「月度最佳教練」獲奬後失分魔咒 車路士對水晶宮賽後分析》

藍獅 於 10/11/2019 發表 收藏文章
《原創文章 歡迎轉載 請列明出處 謝謝》
-請支持藍獅 Facebook專頁-


黎到11月國際賽週期前球會既最後一個比賽日,車路士喺主場迎戰水晶宮,亦係舊將兼隊長加利卡希爾自上季約滿離隊後首次以對手身份重返史丹福橋,照樣地受到唔少車路士球迷歡呼叫好,值得尊重。

講番場波,由於佐真奴上場聯賽再領一面黃牌,令意大利人開季至今經已存夠五面需要自動停賽一場,促使林伯特喺正選陣容上作出唔少「驚喜」變動,適逢簡迪傷癒復出,上次歐聯對阿積士既賽事都已經喺後備名單當中,而今場取代佐真奴既位置成為後防線前既最後一人,同時林伯特收起聯賽經已全勤左唔知幾耐既艾斯派古達,改由尼爾斯占士打正選,至於上場歐聯半場被換走既馬高斯阿朗素就由艾馬臣所取代,其他位置則未有變動。

以上下半場黎睇,上半場雙方處於比較膠著既狀態,雖然車路士取得唔少優勢,而水晶宮好多時都要依賴前線回後到中場幫波,再加上近禁區頂既犯規去阻止藍軍推進,不過車路士依然無法取得領先局面,而佐真奴不在場之下發板校炮既職責就交左比簡迪,哩位法國中場雖然都照舊走上走落,不過今場放波既次數明顯比以往多,尤其係喺中圈近前場區域經常性以長傳直斬邊線,而且準繩度亦相當之高。

而下半場一出返黎車路士喺一鼓作氣下終於攻破水晶宮大門,艾巴咸門前果下冷靜處理當然值得一讚,不過今場波佢既甩波次數其實都唔少,而且略嫌哩位英格蘭前鋒過於支點二傳,好多時其實自己有空位去控定跑一段,佢都選擇二傳比後面蒙特等人,但傳球力度同位置都去唔到隊友腳下,哩個現象喺今場出現得比較多。至於攻擊線另一人「美國隊長」就明顯愈漸上力,點契上雖然仲未足好多時同蒙治走埋同一個位,不過喺一啲持球過人同捕位入攝上表現得相當一流。

同時今場亦要一讚尼爾斯占士,將佢取代艾斯派古達打正選明顯係林伯特既針對性部署,明顯係要用佢黎鉗制住對面既韋費特沙夏,而得出既效果亦相當理想,無論喺速度、身位以至爆發力上占士都完全不落下風,沙夏絕對可以話比佢守到一棟都無,而早前仲傳話如果轉會禁令就能成功打甩就會將沙夏定為引援目標,不論今場波既表現,車迷們都早以異口同聲講「不了」。

而喺領先兩球下林伯特亦係完場前大約計埋補時仲有差唔多十分鐘既時間,換入另一位中場小將比利基摩(Billy Gilmour),睇落時間好少,不過其實對於球員本身既信心同隊內士氣都有正面幫助。

黎緊又到國際賽週期,正當傷員陸續復出後又到佢地最易受傷既時段,尤其係簡迪,只希望佢地能夠喺兩個星期後健健康康咁歸隊。


文章發表時間 : 10/11/2019 11:55
文章最後更新時間 : 10/11/2019 11:55

《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

標籤: 車路士  林伯特  水晶宮  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→