《恨鐵不成鋼 重創後變為平凡的名字 - 蘇馬 (上)》

藍獅 於 09/04/2020 發表 收藏文章
《原創文章 歡迎轉載 請列明出處 謝謝》
-請支持藍獅 Facebook專頁-


六年前,蘇馬曾經係一名被寄予厚望既後防球員,亦被認定為係法國國家隊未來既核心球員,但經歷六年過後,無論喺車路士還是國家隊都依然未打得上長期正選,今日既蘇馬反而比到人一種恨鐵不成鋼既感覺,甚可以話不進則退,法國人於史丹福橋既生涯,該如何是好?

蘇馬於家鄉本土球會聖伊天出道,當時既佢被評為法國繼華拉尼後另一位未來後防新星,身高手長、出擊力強、落腳準繩、再加上速度上具備爆炸力,令時任主帥摩連奴早已將蘇馬納入目標之中,摩佬對於收購中堅係有一定程度既眼光同要求,再加上喺皇馬時期一手提拔華拉尼,當時令唔少車路士球迷都熱切期待,最終車路士於14年頭冬季轉會窗正式向聖伊天提出收購,經協商後雙方達成先買後租既方式,收購後會喺聖伊天效力多半個球季,直到夏天至正式向藍軍報到。

而摩連奴亦將唔太符合戰術要求既大衛雷斯賣到巴黎聖日門,騰出空間比外借回歸既蘇馬,喺車路士後防既架構上黎講法國人既加盟明顯係為藍軍後防既未來開始鋪路,始終當時陣中既中堅人選無論係泰利定伊雲奴域經已三字頭,而再下一級既加利卡希爾亦已經二十有八,的確係要有新血開始為接班做準備,而蘇馬無論喺年齡同潛力上都係一名非常符合條件既人選。

法國人能夠填補到當時車路士防線缺失既速度同活力,摩連奴除左喺賽季後半段開始比蘇馬以正選於英超上陣外,亦好肯喺歐聯賽場比機會佢,而無論拍泰利定加利卡希爾,佢都做到組合上既化學作用,唔好睇蘇馬個身型「大大份」,佢跑起上黎既速度喺後衛黎講其實都算幾快,而且對抗性亦都唔差,好多時啲一對一爭頂都唔會輸蝕,可以話完完全全係速度同力量既混合體,加上出腳剷波時機得宜唔會拖泥帶水以及擁有良好既傳球視野,能夠準確地將個波通過長傳運送到比前線隊友,基本上無論喺攻或守兩方面都相當出眾平均,再加上有泰利哩個老大哥喺旁邊,就算犯錯都有人包底,令蘇馬做既決定可以更加大膽。

可惜好景不常,正喺衝上雲霄既進程當中一次疏忽大意既落地動作,唔單止重創左蘇馬既十字韌帶,更可以話重創左佢既職業生涯,下回將會延續討論以及探討佢喺史丹福橋既前境應何去何從...


文章發表時間 : 09/04/2019 11:05
文章最後更新時間 : 09/04/2019 11:05

《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

標籤: 車路士  蘇馬  泰利  

留言


請按此登錄後留言。未成為會員? 立即註冊
    快捷鍵:←
    快捷鍵:→