《復賽後至今四場仍未上陣 選擇棄用佐真奴是福 還是禍?》

BluexLion車迷手記 於 07/07/2020 發表 收藏文章
《原創文章 歡迎轉載 請列明出處 謝謝》
-請支持藍獅 Facebook專頁-


自英超復賽之後,車路士除左恆常正選之外大部份後備球員亦最少參與過一場賽事,唯獨是只有陣中副隊長佐真奴仍然尚未為球隊上陣,哩位意大利中場喺停賽前由於累積夠第二次五面黃牌,需要再一次停賽一場,但之後喺聯賽對曼城、足總盃對李斯特城以至近期對韋斯咸還是屈福特既賽事都只列於後備席上,而藍軍喺過程中收錄得三勝一負,究竟選擇棄用佐真奴是福還是禍?一齊探討一下...

自佐真奴登陸史丹福橋以黎,一直批評既聲音都大於讚賞,主要原因除左係佢搶去左車迷們心目中頭號寵愛球員簡迪最擅長既防中位置之外,其本人既踢法亦顯得不受討好,更冠以「舒服哥」之名,取笑佢既踢法舒適,而每場波只係擦傳球數據但沒有太多實際助攻;當然,車迷們對於藍軍過去哩二十年甚至更長既時間,喺防中位置上既用人都有一副「又黑又硬」既慣性喺度,遠至馬基利尼(Claude Makélélé),之後到艾辛(Michael Essien),再去到依加既簡迪,三位球員硬淨既踢法可以話令車迷們睇到入左血,亦同時係我地向來引以自豪既地方。

不過經歷時代變遷,足球既時代近年黎亦開始展開新一頁,傳控踢法大行其道,而同一時間場上球員既職責亦開始進化到五花八門,中堅球員除左固有既防守能力之外亦要求開始識得用波,前鋒球員除左射門觸覺入波之外亦需要有回徹墜後至中場做波既能力等等,種種因素都驅使足球時代改變,各個球員一兼多職,開始以區域劃分而非傳統既位置企位上,而各隊主帥亦要開始為陣中每名球員發挖大於「一」既功能同配搭,令戰術變換更加豐富,推動其細節更為微量化。

受惠於近年既傳控踢法,令佐真奴等擅於指揮及策劃既墜後形中場開始相繼出現,進一步取代過去球迷們對於防中位置一定要專注於防守上既形象,當然,哩個轉變球迷們受唔受落係一件事,喺等價交換以及有得必有失既規條下,加強左球隊向前進攻既板斧同控球機率既同時,難免會減弱左防守既硬度,亦變相容易比對手掌握打反擊既機會,與此同時將簡迪推前,進一步將其覆蓋面積由專注後場放大至全場,令佢更為全能化,但同時亦增強左法國人喺體能上既負荷,傷患頻密度亦與日俱增,而車迷們對於簡迪既改造聲音亦好壞參半。

自復賽第一場對維拉既賽事中簡迪重新以防中位置上陣,獲得普遍球迷們認同及讚賞,而喺對李城既足總盃賽事更見小將基爾摩亞(Billy Gilmour)於正選陣容之中,繼而部份討論群組甚至高呼佐真奴可賣既標題出現,實在一笑置之,而事實的確睇到,基爾摩亞雖然具備潛質但未成大器始終需要時間浸淫,再以近兩場波為例,喺對韋斯咸失利既賽事中睇到即使簡迪出任防中位置既亦可以出現多於一個失波,而喺對屈福特既賽事亦見得到球隊喺缺少左佐真奴底下進攻過程中缺乏方向性,即使取得入球亦相當依靠個別進攻球員既個人能力,而非球隊整體互動配合。

個人一直認為藍軍對於簡迪同佐真奴係有共同需要,探討能否「共存」只能以文中等價交換作結論,不過因應對手而作出用人上既變化係事實,一支強隊亦理應擁有各種類型球員配合出不同既戰術變化,哩一點係無容置疑的;雖然林伯特並未有詳盡解釋棄用佐真奴既主因,只係表示每場波既正選陣容都係經過深思熟慮作出安排,不過喺簡迪及高華錫都因傷缺陣底下,估計佐真奴亦會復任正選位置之中,至於賽季結束後係咪真係會賣走哩位意大利國腳就仍然保持觀望態度,不過相信答案黎緊亦會好快揭曉....


文章發表時間 : 07/07/2020 11:45
文章最後更新時間 : 07/07/2020 13:40

《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/
標籤: 車路士  佐真奴  林伯特  

留言


請按此登錄後留言。未成為會員? 立即註冊
    快捷鍵:←
    快捷鍵:→