《得正選 成雞肋 - 法比加斯》

BluexLion車迷手記 於 18/04/2018 發表 收藏文章
《原創文章 歡迎轉載 請列明出處 謝謝》
-請支持藍獅 Facebook專頁-

.圖片來源 : tribuna.com

文章開始之前先比一樣數據大家睇,上季既法比加斯為車路士上陣34場聯賽賽事,其中只有13場係喺正選十一人名單當中,首發率不足一半,不過交出左5入球12助攻,而去到今季至今,法比加斯經已上陣31場聯賽賽事,而其中經已有22場係正選,但只有1入球4助攻,明顯喺今季被干地委以重任,但在出場機會多左既情況下交出既數據並不漂亮,亦係反映出今季車路士喺聯賽既排名嗎?

無可否認既係,以隊內球員質素黎講,法比加斯喺傳球視野、串聯能力、長傳準繩度方面都絕對係首屈一指,自加盟之後一直都係球隊既助攻王,成為車路士既中場大腦,負責控制比賽節奏,罰球角球都交比佢處理,只要搵岩機會就交出「手術刀式」傳送,直接將皮球交到對手心臟地帶。而自干地上任後,為配合戰術需要,法比加斯亦要面對自己最唔拿手既一面,就係防守。

貴為世界級助攻王,都經已三十出頭,法比加斯甘願為左擺脫游走正選與後備之間既旋渦,而提升自己既防守質素,功能上雖然未及上季馬迪咁全面,但至少喺場上真係見到西班牙人既改變。但去到今季,馬迪走了,換黎既就係巴卡約高、巴克里、真禾特等人,後兩者長期受傷患困擾,狀態成疑下根本好少出場機會,而巴卡約高對干地既戰術理念仍然處於不熟悉階段,引致法比加斯近日亦成為左球隊既常規正選。

得到正選十一人名額,但同時成為左隊中既雞肋,防守既弱點開始暴露於對手既針對性部署之下,法比加斯既防守主要係以眼神或作狀去做埋身迫搶,其實只係得個樣根本無意識同無實際用途,同時過往佢都有下半季就跌watt既慣例,全場奔走喺體力上其實都唔足夠維持一場九十分鐘既賽事,唔講獨到傳送,就連一啲平時穩陣既傳球都交失,亦係今季助攻數字大跌既主因。當然,干地貴為球隊主帥亦需要負上責任,話就話依加除左足總盃戰線外一週一賽,但繼續「食老本」落去的話,球迷們又唔知要襟爆幾多個平安鐘了。

可以話就算法比加斯係雞肋,都係一個被迫成為雞肋既雞肋。

文章最後更新時間 : 18/04/2018 11:00


《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/
標籤: 車路士  干地  法比加斯  

留言


請按此登錄後留言。未成為會員? 立即註冊
    快捷鍵:←
    快捷鍵:→